MIRROR成員Lokman Alton脫離服裝品牌 創辦人Tiger有製衣界家人撐

MIRROR多位成員都有投資副業，但係近月接連傳出是非，Jer（柳應廷）同隊友Jeremy（李駿傑）等投資嘅日式食肆早前宣布結業，更傳出欠款未還。最新一單係MIRROR最年輕成員Tiger（邱傲然）創立嘅時裝品牌喺IG宣布，本來一同合作嘅Lokman （楊樂文）同Alton（王智德）即日起離開品牌Dézert。聲明表示「由即日起Lokman Alton正式離開Dézert。我們有着共同意向『分開創作 空間更大』，以後有機會以不同方式繼續合作，祝發展順利」。三人都有轉發呢份公布，但未有詳述拆夥原因。

Tiger 喺2020年成立Dézert，當時佢表示家人都係從事製衣業，喺佢地支持下開設個人品牌，風格偏向日系，因為Tiger自細就受日本時裝離誌薰陶。而Tiger後來更邀請Lokman同Alton加入，希望灌注街頭風格。年紀最細嘅Tiger同隊長Lokman感情好好，受訪時曾經表示，因為要為MIRROR《破鏡》MV做導演，緊張到不停約Lokman食飯傾偈。因為Tiger好欣賞Lokman，連小虎隊（Tiger嘅fans）都話Tiger暗戀Lokman，而早前Tiger第一次執導短片《是日精選》都係由Lokman做男主角。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！