MIRROR成軍記事 「全民造星」四字成真 打破娛圈多項紀錄

即使2021年仲有廿幾日先完，即使話今年係男團MIRROR天下都唔會有人反對。12位鏡仔打破「大台捧紅人」定律，聲勢堪比當年四大天王，廣告代言俯拾皆是，甚至你我身邊都有一個以上「鏡粉」。一齊回顧MIRROR呢3年嘅「沿途高低」，睇吓佢地點樣將「全民造星」呢4粒字，由節目名變成社會現象。

2018年，ViuTV開台2年，對大台TVB仍未造成威脅。由TVB轉投Viu嘅節目監製花姐(黃慧君)，提出舉辦仿傚韓國Produce 101嘅真人SHOW選秀節目《全民造星》，由99位入圍男生揀出1個冠軍，獨得100萬獎金。

但係花姐嘅盤算並唔係要為電視台「造星」，後來嘅訪問佢提到，節目本意係將參加者追夢過程中嘅殘酷展現俾觀眾。直到第一圈賽事，有位曾經用2年時間全職追尋音樂夢想嘅參加者，第一圈就被淘汰。呢位年青人向花姐哭訴「要返回現實，放棄呢個夢」，令花姐過意唔去，決定向高層提議將部份參加者組成男團出道。

有份促成呢隊男團誕生嘅呢位年青人，就係MIRROR嘅阿Jer。

2018年11月3日，ViuTV喺鑽石山荷里活廣場舉行記者會，宣布由《造星》參加者組成嘅12人男團正式出道，取名MIRROR，寓意團員能夠獨當一面之外，聚合起來都可以有無限可能。成員除咗有《造星》三甲陳卓賢(Ian)、楊樂文(Lokman)同姜濤之外，仲有十強人選嘅邱士縉(Stanley)、李駿傑(Jeremy)、江熚生(Anson Kong)及呂爵安(Edan），並加入未能晉身決賽嘅柳應廷(Jer)、盧瀚霆(Anson Lo)、邱傲然(Tiger)及陳瑞輝(Frankie）。

當日MIRROR公開首支單曲《一秒間》，大會更宣布MIRROR於同年12月舉行演唱會，以49日時間打破香港歌手／團體出道後最快開演唱會紀錄。同日，《造星》監製花姐（黃慧君）亦公布將會擔任MIRROR經理人。

雖然喺年尾出道，但係憑住《造星》嘅節目人氣，MIRROR喺年尾嘅叱咤頒獎禮打入「我最喜愛的組合」票選最後五強，《一秒間》亦進入「我最喜愛的歌曲大獎」十強。

出道聲勢強勁，但MIRROR轉瞬就經歷新人必經嘅低潮期。

2019、2020年香港經歷社會運動以及新冠疫情，觀眾留意新聞少理娛樂事，各類品牌都減少宣傳活動，對有12位成員嘅新人團體打擊好大。即使《造星》時人氣強勁嘅姜濤單飛開個唱，場地選址都只能夠係容納幾百人嘅場地。而Viu捧人部署上都出咗問題，例如安排MIRROR成員參與《造星2》，令觀眾極為不滿。就連姜濤等人拍嘅護膚品廣告都俾網友恥笑，加上音樂會、唱片計劃全線推遲，成員維持生計都成問題。

情況到2020年底有所逆轉，半隊MIRROR參演嘅劇集《男排女將》有口碑，同時《造星3》嘅演出水平提升，令唔少觀眾翻煲《造星》，對MIRROR有更多認識。2021年1月1日叱咤頒獎禮更加係MIRROR人氣爆發分水嶺︰MIRROR奪得組合銅獎，單飛嘅Jer 同Anson Lo分別奪得生力軍金獎及銅獎，姜濤更於全港樂迷投票嘅「我最喜愛的男歌手」及「我最喜愛的歌曲」大獎，令唔少人驚覺，MIRROR比想像中更受歡迎。

自此MIRROR及成員作品開始受人注目，今年單飛嘅Edan首支單曲《E先生連環不幸事件》奪得3大電台流行榜冠軍，MV至今觀看次數過千萬，以香港歌手計絕對難得。由Edan及Anson Lo主演劇集《大叔的愛》創下Viu收視紀錄。Viu更安排喺暑假期間每個星期推出一位成員個人單曲。5月，MIRROR於九龍灣展貿Star Hall舉行第2次演唱會 ONE & ALL LIVE 2021，一共6場。由於MIRROR人氣大發，門票難求，有「黃牛黨」開價6位數字出售原價＄780嘅尾場門票。

廣告代言都係人氣指標。有統計顯示，今年頭8個月，MIRROR包辦全港7成廣告代言。人氣高企嘅成員差唔多每星期都有品牌活動，而且所到之處定必萬人空巷，7月MIRROR與ERROR全體成員出席屯門商場活動，估計過萬歌迷聚集商場及附近一帶霸位，有人4日前已經到場。

MIRROR 爆紅，fans應記一功。除咗乖乖「課金」買偶像代言產品之外，姜濤生日前後，「姜糖」喺姜B屋企所在嘅銅鑼灣買下大量廣告位，令該區變成「姜濤灣」；Anson Lo嘅神徒就喺天星碼頭巨型廣告牌刊登賀壽廣告，更成為打卡熱點，令「教主」人氣急升，甚至IG fans人數追過人氣隊友姜濤。

呢股MIRROR熱潮仲未有停低嘅勢頭︰今年叱咤「我最喜愛的男歌手」5強之中，有4位都係MIRROR成員；姜濤、Edan、Anson Lo、Jer同Anson Kong參演嘅電影亦會陸續上映。仲未計傳聞中下年7月舉行嘅10場紅館個唱。2022年，繼續係鏡仔嘅世界！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！