MIRROR效應 ViuTV轉虧為盈賺近1億 收益升1.5倍

MIRROR喺舊年全面爆發，12子廣告代言多多，估計吸金能力唔嘢少。「鏡仔」所屬公司電訊盈科尋日公布業績，唔止財經版同事要睇，娛樂版行家更加要知，因為呢份可算係MIRROR搵錢表現成績表。

根據公布，電盈免費電視及相關業務收益上升百分之152，由2020年嘅3億1700萬至港幣8億元；而EBITDA（扣除利息、稅項、折舊及攤銷前盈利）由2020年虧蝕1億6500萬，轉虧為盈到淨賺9400萬。業績公布點名提及MIRROR同Viu對盈利嘅貢獻，指出「2021 年是 ViuTV 標誌性的一年。年內，借助 MIRROR 的成功，本集團的其他業務亦取得優勢」。

免費電視及相關業務估計係指ViuTV廣告收入、節目發行以及藝人管理等項目，所以難以分拆單單由MIRROR帶來嘅收入有幾多。但係去年因為MIRROR大發，Viu節目收視上升，廣告費逆市加價，連帶其他Viu旗下藝人都多咗工作，能夠比前年多賺5億，鏡仔功不可沒。

報告又提到，喺東南亞拍得住NetFlix、俗稱「黃Viu」嘅OTT（Over The Top)業務亦接近收支平衡，並會加強原創內容，今年會推出超過30個不同語言作品。前TVB高層杜之克過檔成為黃Viu原創內容總監，將會主力開發華語市場。

那邊廂TVB稍後會公布2021年業績，而上半年業績錄得2億8400萬虧損，按年減少百分之3.1。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！