MIRROR踩台準備演唱會 AK江𤒹生再出黑圖 監製話「盡力而為」惹關注

MIRROR 一連16場FEEL THE PASSION演唱會將於下周(15日）展開，成員之一Edan呂爵安喺IG POST咗一張入台相，似乎12子近期已經喺場館準備綵排。

但係MIRROR成員之一AK江𤒹生，尋晚喺IG限時動態發出黑圖，令人擔心係咪有其他唔如意事影響心情。

而MIRROR演唱會監製莊少榮都出咗3個限動post，寫上「唉」、「xxxxx」同「每日，盡力而為。希望，一切順利。一定要集中精神，亦要爭取時間好好休息。Goodnight。」，更令外界聯想到演唱會綵排係咪有阻滯。

前年MIRROR首次紅館演唱會演出前，已經傳出舞台機關危機四伏，甚至綵排時有舞蹈員受傷，AK及Frankie(陳瑞輝)當時已經出過黑圖，AK亦另外發文為舞蹈員打氣。加上有指MIRROR成員唔夠時間踩台，令演出險象環生，出現吊橋搖搖欲墜情況，Frankie陳瑞輝更加喺台上跌親。到第4場個唱更發生屏幕墮下事件，令舞蹈員阿Mo（李啟言）頸椎骨折受重傷，至今仍未完全康復。

汲取教訓，今次演唱會前MIRROR成員已經減少工作專注排練，只係全團出席叱咤頒獎禮，新城頒獎禮更只派AK、Ian陳卓賢及Jer柳應廷出席。而隊長Lokman受訪時表示，佢地公司都要求今次演唱會簡單安全為主，以成員個人魅力壓場。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！