MIRROR演唱會事故︳與Mo家人首次見面 舞者形容憔悴So Ching「皮包骨」

MIRROR演唱會屏幕墮下事故至今已經近2個月，外界對於受傷舞者Mo(李啟言）及阿峯（羅梓峯）最新情況，都係透過佢地委託嘅友人向外發佈。早前，Mo爸爸李盛林牧師透過教友羅乃萱發布代禱信中提到，早前Mo家人有機會與其他舞者們會面，又指「是次的會面讓我們能有相擁，互相支持和鼓勵的時刻外，我們更了解是次演唱會發生事故的相關事宜」。

尋晚部份MIRROR演唱會表演舞者都喺社交平台相繼發文，透露關於呢次會面嘅情況。從相中及文字描述所知，Mo女友、女團COLLAR成員So Ching（蘇芷晴）當日都有出席。Mo出事後，唔少人都擔心So Ching情況，只見「師兄」不時喺IG發布限時動態，但多數係抒發感受少提個人狀況。有份出席會面嘅舞者Terry就指「見到so ching，瘦至皮包骨，疲態盡現，亦都心感無力」。而另一舞者Mannsze就形容當晚見到Mo家人和SoChing，「感覺到佢哋非常疲倦崩壞嘅精神狀態，但仍然繼續用和平堅強嘅雙眼堅持住，好心酸，但我們在一起」。而舞者Angus就寫道「自從演唱會第一天完結在後台和soching見面後，事隔大約一個多月才能見面和交談，期間真的非常擔心她，看着她神情低落只感到哽咽難言，知道她原來都在擔心我們令我更痛心，唯有可以做的只有互相擁抱，給予大家力量」。

Angus亦提及見面嘅情況，「記得當天李牧師和家人交代Mo的情況和整個災難的詳細經過時，感到悲痛欲絕，大家情緒都非常激動，除了哭和互相扶持，我們做不了什麼，非常無助。最後大家一起為Mo去禱告，其實我們最希望的只有Mo能完全康復，一起繼續走下去！」。至於舞者Kaki就覺得當晚係人生中有某幾個畢生難忘嘅晚上。

同樣喺演唱會上受傷嘅舞者Zizac（羅德智）亦post出當晚同Mo爸爸李盛林牧師擁抱嘅照片，佢話「呢個擁抱對於我黎講有極巨大意義 ／ 唔係我帶比牧師一份關心或者安慰 ／ 係調返轉一個爸爸對我既支持 ／ 而且呢一位爸爸既兒子仲要係病房既時候，佢比咗一道咁強大既力量我」。

而So Ching本人都有發限時動態，分享Zizac嘅帖文，下面寫住「原來只係過咗55日」，令人倍感心痛。

尋日有報道指演唱會製作單位Makerville，入紙申請明年7月紅館檔期為MIRROR再開演唱會，Makerville方面已經回應傳媒查詢，並指「報道並不真確」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！