Stanley邱士縉《野人老師》獲鄭丹瑞大讚 不介意被指下弦努力做好自己 姜濤感佩服

ViuTV熱播劇集《野人老師》係MIRROR成員Stanley邱士縉及Frankie陳瑞輝於演唱會意外停工兩個月後首個播出嘅作品，唔少觀眾大讚首次擔任男主角嘅Stanley邱士縉，認為其進步非常大，亦樂於見到佢往演員方向進發。

舞蹈員出身嘅Stanley一直被指為MIRROR「下弦」，不過佢認為只要做得好，就會有人留意，於是默默耕耘嘗試演戲，先後拍攝《地產仔》、《大叔的愛》、《IT狗》及《I SWIM》，又曾出演台灣電視劇《第三布局 塵沙惑》。Stanley喺《野人老師》中飾演英文補習天王李白，因一次桃色醜聞被趕出補習社，喺事業低谷之際，老婆（沈殷怡飾）提出離婚，因而決定回到爸爸李世豪（鄭丹瑞飾）於坪澳灣創辦嘅「大地小學」執業。觀眾對於Stanley表現好滿意，認為佢演出生動又自然，演活角色嘅市儈性格；鄭丹瑞亦表示對Stanley刮目相看，認為佢放低偶像包袱演戲，又指佢同時間仲有另一部劇集拍攝，但仍然無遲到早退，保持演員敬業態度。

與Stanley感情要好嘅姜濤亦於IG限時動態分享Stanley主唱嘅《野人老師》主題曲《重新介紹》，表示替對方感到開心：「知道你多少有點擔心，很緊張，但請你放心，真的很好看，知道你一直以來的夢想就是成為演員，所以這次真的很替你開心，因為知道你背後的付出，知道你背後有多麼努力鑽研演戲，所以有時候我也盡量把我學到的都跟你說，很想幫助你，完成你的演員夢。」姜濤又表示好佩服Stanley努力去做好自己唔擅長嘅唱歌：「雖然你知道大家在MIRROR裡可能並不會第一個看到你，但你還是能保持一個好的心態，這一點弟弟真的很佩服你。」Stanley亦有轉發姜濤帖文，留言指︰「做咩突然咁肉麻，不過我愛你，在心中。你太過份了。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！