The Do Show｜梁朝偉劉德華激罕談與另一半維繫關係秘訣 偉仔自揭曾失控打爛全屋嘢

電影《金手指》由梁朝偉、劉德華兩大影帝主演，並集結蔡卓妍、白只、任達華、陳家樂、姜皓文、岑珈其等人，陣容鼎盛，亦係梁朝偉與劉德華繼2002年《無間道》睽違20年再度合作，飾演正反兩派。日前，梁朝偉、劉德華接受鄭裕玲（Do姐）YouTube頻道主理節目《The Do Show》訪問，罕有談及與另一半嘅相處模式，以及揭開不為人知嘅一面。

Do姐表示梁朝偉、劉德華除咗鍾情拍戲和工作，對伴侶都係好長情嘅人，詢問佢哋係點維繫關係，梁朝偉坦言覺得與太太劉嘉玲可以相處咁耐係因為對方比較遷就自己：「我好孤僻，我又好少陪佢，不過久唔久我都會陪吓佢嘅，出嚟同朋友聚吓餐，但有時我真係好怕一啲好多人嘅場合。佢鐘意熱鬧，我鐘意靜啲，但好多時候都係佢就我，不過我覺得呢個都係互相遷就同互相尊重。」向來對感情低調嘅劉德華亦分享指與太太朱麗蒨都無就大家：「我又唔知佢覺得我有咩好，我又唔知我覺得佢有咩好」，又分享指曾經分隔兩地，但可以半年唔傾電話；Do姐就笑話慘過異地戀，但證明大家搵啱人；劉德華更透露自己茹素原因全因太太和女兒，覺得太太同囡囡都食素，但自己食肉好奇怪，又希望同屋企人一齊於是展開食素嘅生活。

Do姐坦言早於電視台認識梁朝偉和劉德華，但從未見過佢哋發脾氣，問及佢哋份人係咪無咩情緒唔會嬲；梁朝偉坦言自己嘅情緒會放喺心中及發自己脾氣：「但喺我印象裡面我真係冇發過脾氣，只會…（做出緊握拳頭嘅動作）。」劉德華直言自己都會發脾氣，只係工作人員見到，又指爸爸媽媽都會見到佢發脾氣呢一面，但就好少喺街發脾氣。期間，梁朝偉補充指醒起自己唯一一次發脾氣嘅情況：「我係一個人嘅、冇人見到，就打爛晒全屋嘅嘢。」Do姐嚇一嚇之後問梁朝偉記唔記得原因，梁朝偉回應指發生喺好耐好耐之前，自己都唔記得咗點解：「由打爛第一樣嘢開始，就冇喇、停唔到。」Do姐笑指好似拍戲咁，又估劉德華應該唔會咁樣發脾氣，點知劉德華答佢會：「會！我會失控㗎！其實我失控個程度唔會低於Tony（梁朝偉）。」、「我記得有一次唔知咩表演或場合，成間公司嘅人喺到講呢個錯嗰個錯，所以就好嬲，我有一個Wardrobe（衣櫃）擺衫嘅地方，因為以前唔想用一個個櫃，就會用一啲棍子掛衣架，我就真係逐條拆掉就發脾氣。」 不過，劉德華就笑言發完脾氣後要執先最麻煩。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！