Tiger@MIRROR首部執導短片《是日精選》成鮮浪潮開幕短片 獲大批網民支持兼大讚叻仔

MIRROR成員邱傲然（Tiger）係隊中最年輕嘅成員，性格相對比較被動及內斂寡言，不過其實佢好有才華，除咗舞技精湛、涉獵多種樂器及武術之外，出身電影學系嘅佢較早前曾為MIRROR第三首單曲《破鏡》MV執導，最近佢首部短片作品《是日精選》更獲選為「第十七屆鮮浪潮國際短片節」嘅開幕短片，認真叻仔呀！

喺MIRROR過去出席活動時，Tiger曾經透露今年會有大搞作，當時已經令到唔少粉絲大呼期待。去到今日（18日）大約凌晨時分，Tiger喺IG限時動態《是日精選》嘅黑白色海報，而導演嘅名字就係邱傲然。海報中見到扮演黑道車手嘅楊樂文（Lokman），一臉沉鬱咁坐喺車上司機位置。佢嘅處男執導作《是日精選》搵嚟MIRROR隊長Lokman擔正，並由MIRROR副隊長江𤒹生（Anson Kong）、成員陳瑞輝（Frankie）和李駿傑（Jeremy）、以及梁祖堯、岑珈其、邱頌偉、黎美萱和林子傑參演；而幕後團隊就包括「花姐」黃慧君擔任監製、及麥可暉擔任編劇等等。

短片《是日精選》獲選為「第十七屆鮮浪潮國際短片節」開幕短片，唔少網民都紛紛留言大讚佢，例如「欣賞佢不斷默默地努力 支持你呀邱導 #努力係有人睇到」、「呢單野真係堅爆, 一直以為虎仔個大project 係同正副出合唱歌, 點知原來係做導演, 叻仔呀」、「支持Tiger 期待邱導作品」、「欣賞Tiger一直低調的在默默耕耘！加油！」、「虎仔加油！希望有更加多機會去發掘自己嘅才能」及「認真做事又勤力的人一定會有回報的，加油」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！