TVB台慶劇曝光？傳馬國明鍾嘉欣《星空下的仁醫》10月播 另一套係《金宵大廈2》？

ViuTV今年氣勢強勁，TVB全年都冇放軟手腳，搵曾志偉加盟做高層執好綜藝節目之後，《聲夢傳奇》同港姐決賽都有唔錯嘅收視。反觀劇集成績就被比下去，王浩信搭惠英紅嘅《刑偵日記》甚至成為近10年最低收視嘅黃金時段劇集。台慶在即，用嚟「省招牌」嘅台慶劇更加不容有失，有傳由馬國明同鍾嘉欣主演嘅《星空下的仁醫》，將會接住《把關者們》喺10月底出街，估計好大機會以「台慶劇」嘅牌頭宣傳！

前稱《兒科醫生》、《兒童醫院》嘅《星空下的仁醫》，我地年初就睇好係台慶劇大熱。畢竟有鄭嘉穎、馬國明雙視帝壓陣，再加本身都係男女主角級數嘅鍾嘉欣同羅子溢，仲有重返TVB嘅周家怡，計卡士已經贏晒。《星》舊年12月拍完，做埋後期都仲有時間俾高層睇睇係咪值得力谷，而家傳出成為台慶劇都係意料中事。

每年TVB台慶都會搵2－3套劇做台慶劇，睇返大台手上存貨，另一套有機會被力捧可能係《金宵大廈2》。《金宵大廈》以奇幻劇情成功突圍，今輯故事據知更加錯綜複雜；而陳山聰同李施嬅呢個組合亦被觀眾受落，作為台慶劇就可以順水推舟推佢地成為視帝視后大熱，話題同收視都有齊！

TVB仲有一批大製作劇集未播，不過比起《星空下的仁醫》同《金宵大廈2》，成為台慶劇嘅機會就細啲喇：

《白色強人II》

論卡士唔輸俾《星空下的仁醫》，有郭晉安馬國明胡定欣兩皇一后格局，不過又係馬明做醫生，要成為台慶劇？除非臨時抽起《星空下的仁醫》啦。

《唐人街》

武打加泰國外景，又被認為係《城寨英雄》姊妹作，仲有陳展鵬加唐詩詠，配搭《星空下的仁醫》的話，一動一靜有吸引力喎。弊在套劇拍起2年半都未出街，合該有事。早排又傳煎pan同唐詩詠對大台唔多聽話，可能最終擺喺年尾年頭嘅「炮灰檔」播。另一套卡士相若嘅《超能使者》，都可能要擺一排嘞。

《飛虎之壯志英雄》

《飛虎》系列向來收視唔錯，上年《飛虎之雷霆極戰》平均收26點以上，連主題曲《呼吸有害》都成為年度歌曲。今輯男角陣容亦都夠開幾套劇，有苗僑偉、黃宗澤、吳卓羲、馬德鐘、張兆輝、郭晉安、陳豪、蕭正楠！成為台慶劇都唔出奇，不過因為係內地合拍之作，檔期可能要同合作平台配合，而暫時仍未見有宣傳預告，所以機會低啲啦。

按此下載 Yahoo APP 9月免費送一萬個蛋撻王Q嘜蛋撻，仲有貓山王榴蓮冰皮月餅/鳳梨奶黃月餅同你賀中秋，立即下載！