收視報告︳TVB台慶24.7點交到貨 李思捷竟然係今期收視保證

TVB台慶
TVB台慶

上周收視焦點又落返TVB身上,台慶嘛!

《萬千星輝賀台慶》錄得平均24.7點收視,算係近年新高,節目本身冇咩特別綽頭都有呢個數,曾志偉總經理可以過關了。據知當晚最高收視時段係李思捷主持嗰part,而李主持嘅星期日遊戲節目《思家大戰》,最新一集直播收視有19.4點!當日搵李思捷做主持,普遍都係負評,但係《思》出街之後,收視一路keep到15、16點左右,最近更出現升勢,李一改以往主持風格,似乎觀眾幾受。

《思家大戰》
《思家大戰》

2套台慶劇又表現如何?《換命真相》終於衝過20點,一至五有20.7點,星期日播大結局更有22.2點,不過全劇平均收視依然唔過20點,完全冇過去「台慶劇=收視好」嘅氣勢。另一套劇《星空下的仁醫》就更慘,上周收視上升但剛好得19.9點,依然唔過20!拉勻平均收視計,《星》好大機會唔過20點,應該只能喺全年劇集收視排名較後位置出現。

全民造星4
全民造星4

講完大台就輪到Viu。《全民造星4》微跌但依然有5.3點,今周開始淘汰賽理應更刺激,但係復活人選爭議太大,可能有觀眾選擇放棄,下個禮拜收視報告可以睇到係咪咁大影響。而以Anson Lo盧瀚霆做招徠嘅《神的女主角》最後一周稍跌至3.9點,今周接力會有另一鏡仔Anson Kong江爗生主持嘅Have a Nice Gym,收廂視成績算係兩位Anson嘅人氣小比併。

11月8-14日︳TVB 2套台慶劇仲未破20點 《全民造星4》不跌反升

上周(11月8-14日)收視報告又嚟啦!先睇TVB,2套台慶劇《星空下的仁醫》同《換命真相》接近結局周,依然未能突破20點收視,《換》比上周升近1點,但仍然只有19.9點;《星》就更慘,未能食住前周升勢,上周反而回落到19.3點。到底2套之中,邊套最終可以破2?而下一檔嘅《十月初五的月光》同《拳王》,會唔會更慘淡?

全民造星IV
全民造星IV

Viu方面,向來《全民造星》嘅第一回合比賽都係考驗各方嘅環節︰近百個參賽者逐個出場,形式又類似,好考觀眾耐性︰錄影由下晝3點去到第二日朝早9點,幕後、評判、參加者同導師齊齊冇得瞓。《全民造星4》第一周有5.3點,本來預計上周會跌,但係居然反地心吸力微升0.2點至5.5點。隨住更多話題選手出現,第3周收視估計有望保持。

上次收視報告講起,另外2套綜藝《神的女主角》同《香港秘密搜查官》收視有驚喜,結果上周出現微跌,各自流失近半個收視點。《神》有4.3點而《香》就有2.9點,後者算係僅僅合格。

下次收視報告,焦點梗係睇《星空下的仁醫》同《換命真相》結局周成績如何,同埋《全民造星4》最後一周個人對決,會唔會趕客呢?

11月1-7日︳《全民造星4》收視好 《星空下的仁醫》靠口碑反超前 兩台大戰冇輸家?

上周三台直播收視報告出爐!今次重點梗係睇ViuTV以《全民造星4》、《神的女主角》及《香港秘密搜查官》三套綜藝節目,為TVB台慶月「贈興」嘅成效啦。

結果都幾出人意表,《全民造星4》首周收視5.3點,以Viu平均嘅3點慣性收視計,算係相當突出,對比前一周嘅《賭命夫妻》更加係升咗6成半。《造星4》收視好都幾合符賽果,亦因此帶動以Anson Lo(盧瀚霆)做主導嘅《神的女主角》有4.7點,一洗前一檔《台灣乜都拜》嘅頹勢。而以《ERROR自肥企劃》班底「無制限OT編集團」創作嘅《香港秘密搜查官》都有3.5點收視,令上周Viu一至五黃金時段整體成績唔錯。

奇就奇在TVB並無因此出現收視下跌,對正《造星4》嘅《星空下的仁醫》上周升至19.4點,超越另一套卡士無咁強勁嘅台慶劇《換命真相》(19點),可以話係受傳媒口碑推介所帶動,估計加埋7天跨平台收視,升幅會更明顯。而首周播出嘅10點半節目《男神廚房》有14.7點,比之前同時段2套旅遊節目更好,證明「限廚令」嘅無謂。而《醫醫,我不想再病了》同之後嘅帶貨節目都冇受影響,即係話多咗人睇電視,和氣收場。

不過《全民造星》系列向來都有個致命傷︰第一回合比賽有九十幾個參加者,雖然今年節目嘗試加快節奏,以1對1比賽增加可觀性,但係呢個階段快極都要播2-3個禮拜,未來2周收視能唔能夠keep住個勢?

10月25-31日︳TVB台慶劇微升 《東張》播曱甴老鼠橫行收視反升

全民造星IV
全民造星IV

上周(10月25-31日)嘅三台收視報告,真係平淡到難以落筆。

TVB踏入台慶月,今個星期Viu正式出招「贈慶」,晚上9點半起先有王牌《全民造星IV》,10點半有教主Anson Lo(盧瀚霆)有份嘅真人show《神的女主角》,連11點都出動《ERROR自肥企劃》嘅「格仔Mike」作品《香港秘密搜查官》。咁意味住上星期嘅全線綜藝都步入結尾,但唔代表收視有升勢。《台灣乜都拜》同《蟲前有10個女仔》本身口碑麻麻,網上亦唔見好多人討論,上周收2.7同2.5點,都可謂跌穿Viu3點嘅慣性收視。稍為有noise嘅《賭命夫妻》保持水平收3.2點,而全周其他節目收視都欠缺亮點。

星空下的仁醫
星空下的仁醫

TVB方面,2套台慶劇首周收視失利。雖然傳媒都普遍大讚《換命真相》同《星空下的仁醫》有水準,但質素高唔代表觀眾buy,廣告商係睇「數」而唔係睇「素」。直播收視方面兩劇依然未過20點,《換》有19.2點微升0.1點,《星》有18.9點升幅較大,到底口碑能否帶動收視,就要睇官方公布嘅「跨平台收視」數字。

東張西望
東張西望

上周《東張西望》連播多宗食物及衛生相關報導,曱甴老鼠橫行鏡頭貫穿觀眾開飯時間,但係《東張》收視不跌反升,有20.7點。雖然升幅唔夠一點,但可能為製作組搵到出路︰觀眾唔怕重口味,仲好好送飯!

10月18-24日︳台慶劇失利《星空下的仁醫》《換命真相》首周唔過20點

上星期(10月18-24日)三間電視台收視報告公布,重點一定係TVB 2套台慶劇《星空下的仁醫》同《換命真相》首周成績如何,結果……唔OK喎!

有馬國明、鄭嘉穎、鍾嘉欣等主演嘅《星空下的仁醫》,本來被寄予厚望,點知頭5集直播收視只有18.5點,比起今年較早前播出、收視平平嘅《一笑渡凡間》(19.2點)更不濟。

星空下的仁醫
星空下的仁醫

同樣係台慶劇,被睇低半線嘅《換命真相》首周有19.1點,稍勝主角陣容更強嘅《星空下的仁醫》。2套台慶劇嘅直播收視數字可以話係唔收貨,除非劇集有口碑帶動觀眾翻煲,否則難以有大幅增長。舉個例,前一檔嘅《我家無難事》首周收約19點,結局周有8號風球「加持」升至22點,由此可見要2套劇收復失地大幅反彈有幾難,或者靠「七天跨平台收視」數字美化一下都得嘅。

換命真相
換命真相

TVB其他節目亦未見有突出表現,新節目《冰島潮什麼》(一至三10點半)守住13點左右;前2周都有颱風帶挈收視嘅《東張西望》同《愛.回家之開心速遞》,上周打回原形,跌至之前的20/21點水平。

蟲前有10個女仔
蟲前有10個女仔

Viu嘅收視都唔見得幾好,前周異軍突起嘅《台灣乜都拜》收2.8點,跌幅有2成半;接力《宵夜燒到過埋夜》嘅《蟲前有10個女仔》更加食唔住前者個勢,得2.5點,比《宵》最後一周流失4成觀眾,似乎要靠11月開播嘅《全民造星4》先有望翻身。而Viu全周收視之冠就係重播掀起換飛潮嘅《拉闊音樂會 風火雷電》,有4.1點。

10月11-17日︳打風再帶挈TVB收視 《我家無難事》結局彈升

上次嘅收視報告提到,前周嘅星期六晚掛8號風球,令TVB當晚收視有所進帳。上星期二又係掛8號波,收視又有冇正面影響?

TVB公布嘅直播收視報告提到,上星期二嘅《東張西望》同《愛.回家之開心速遞》都因為打風而取得高收視,《東》收27.8點而《愛》就有26.6點,亦都帶動周一至五平均收視升1-2點。

另一焦點係黃金時段劇集《我家無難事》同《把關者們》結局周成績。2套劇開播後收視疲弱,但係後半段開始穩步上揚,最終《我》最後5集收22點,以全年劇集成績計算不過不失;而《把》一至五收19.5點,星期六大結局收18.5,始終無力突破20點。

台灣乜都拜
台灣乜都拜

Viu方面,一至五收視可能都受颱風影響而上升,其中2個新綜藝節目《賭命夫妻》及《台灣乜都拜》算有驚喜,分別有3.3點及3.7點,過咗Viu慣性收視3點嘅水平。《台》呢類民俗獵奇節目嘅成績可以話少少爆冷,難怪TVB J2創作總監C君都搞個講鬼節目。而《宵夜燒到過埋夜》最後5集平均超過4點,足證《空肚講宵夜》3位主持嘅組合的確受觀眾受愛戴,點樣再下一城就要睇Viu嘅創作團隊啦。

10月4-10日︳打風益咗TVB 6點半新聞收視今年最高《東張》《愛回家》逾25點

上星期收視報告重點,唔在於節目表現,而係星期六打風對各台收視有咩影響!

星期六八號波掛足一日,唔少人都留喺屋企,過往打風日子節目收視都會上升,因為冇街去嘛。而家留喺屋企可以上網睇片,呢個定律有冇改變?

《愛.回家之開心速遞》
《愛.回家之開心速遞》

星期六晚TVB《6點半新聞報導》直播收視高達18.5點,成為全年呢節新聞最高收視,比過去4星期彈升近7點,已經見到颱風威力。而2大皇牌《東張西望》及《愛.回家之開心速遞》收視更加雙雙過25點,比上星期分別高出6及7點,增幅驚人!

同樣情況亦發生喺ViuTV,6點鐘嘅新聞報道比前周高一倍有多,《辣王傳》由1.7點升至2.6點,增加5成以上。至於香港開電視都喺颱風天有所進帳,但未太明顯。由此可見,打風對電視台嚟講絕對係好事,而觀眾人數上TVB最為得益。

童你一起長大了
童你一起長大了

睇返各節目表現,TVB兩線劇表現好轉,《我家無難事》終於過20點,《把關者們》亦升到18.6點。星期日嘅《童你一起長大了》稍跌至15點,而《思家大戰》就站穩至16點左右。

膠戰S2
膠戰S2

Viu方面,姜濤主演嘅劇集《超感應學園》、綜藝《夕陽新丁》及《宵夜燒到過埋夜》收視幾乎不變,而口碑唔錯嘅《膠戰S2》喺星期日10點半時段有近4點收視,已屬不俗,甚至可以突襲TVB《勁歌金曲》(6.4點),喺嗰個時段同TVB打成「五五波」。

9月27日-10月3日︳TVB ViuTV 新節目 有好成績係意料中事?

上星期(9月27日-10月3日)電視台直播收視報告,可以話係「意料之內」。

先睇新節目表現,TVB一至五十點半綜藝檔換上《#好掛住日本》同《醫醫,我不想再病了》,星期日就有《童你一起長大了》。《#好掛住日本》收12.9點,比前檔嘅《煮戰》差,畢竟TVB觀眾層面較為年長,講日本食買玩未必受落。至於上星期我地都估到會有好成績嘅《醫醫,我不想再病了》收13.7點,比之前嘅《代溝關注組》升1點。畢竟Viu同開電視嘅日本醫學資訊節目都有好收視,《醫》帶起收視不足為奇。

醫醫,我不想再病了
醫醫,我不想再病了

搵返那些年兒童節目主持人重現螢幕嘅《童你一起長大了》有16.2點,比之前嘅《暑假玩到盡》升1點以上。《童》捉到觀眾想睇久未露面藝人近況嘅好奇心,加上兒童節目的確係成年觀眾嘅集體回憶,估計收視仲有得升。

童你一起長大了
童你一起長大了

話時話,曾志偉總經理一手打造、星期日8點檔嘅《開心大綜藝》,係咪已經當冇件事呢?

Viu嘅新節目《宵夜燒到過埋夜》有《空肚講宵夜》主持班底梁祖堯、陳俞希同蔡瀚億,本身《空》已經有口碑先做到8季,加上3個人本身默契好,《宵》收視有3.4點,更勝之前有MIRROR成員主持嘅《幫緊你應援團》,你話係咪意料中事?

宵夜燒到過埋夜
宵夜燒到過埋夜

其他值得一提嘅收視情況仲有TVB黃金時段兩線劇集都稍見回升,《我家無難事》貼近20點,《把關者們》亦衝破18點,不過都只算係合格而已。而《思家大戰》就出現反彈至15.5點,可能係《童你一起長大了》收視好所帶挈。

9月20-26日︳細台醫學節目有捧場客 TVB照跟有原因

健康要fact check
健康要fact check
健康要fact check
健康要fact check

又係睇收視報告時間,有留意開呢個欄目都可能知道,Viu同香港開電視嘅每周收視之寶,並唔係自家製作,而係外購嘅健康資訊節目!睇返上周(9月20-26日)收視報告,Viu嘅晚間黃金時段最高收視節目,係星期日晚嘅《健康要Fact Check》,有3.5點;而香港開電視嘅《健康原因講多D》雖然只有1.9點,但已經係全周第二高收視節目。醫學健康常識同飲食節目一樣,總會有固定捧場客,難怪TVB今個星期四、五晚十點半會推出健康資訊節目《醫醫,我不想再病了》,務求衝一波收視,唯一隱憂可能係太夜播,銀髮族觀眾都就寢去也!

其他節目收視嚟睇,TVB兩線劇集《我家無難事》同《把關者們》播到第2周,仍未能扭轉收視麻麻嘅局面。《我》有19.1點而《把》有17.4點,直播收視分別微跌0.2及0.4點,除非劇情有突變,否則唔見得呢2套劇會有咩起色。

曾志偉加入TVB 8個月,著手改革綜藝節目,尋日仲升職成為總經理。睇吓呢期嘅綜藝節目,《暑假玩到盡》越走越低唔夠15點;《思家大戰》第一集有驚喜之後亦隨即走樣,星期日嗰集跌到14點附近。其中一個大刀闊斧改革嘅《勁歌金曲》仲慘不忍睹,由起初嘅12點左右慢慢跌,由9點半調到10點半後就更弱,剛過去星期日嗰集得返5.4點。

根據TVB公布,曾總經理嘅職能會係監督內容營運,包括綜藝、合拍劇同音樂。更多權力在手之下,總經理會唔會有更創新嘅節目編排呢?

9月13-19日︳《我家無難事》《把關者們》收視遜預期 姜濤Anson Lo微微谷起《超感應學園》收視

TVB公布上周(9月13-19日)三個電視台直播收視,上星期TVB同ViuTV合共有3套新劇開播,一齊睇吓成績如何。

把關者們.劇情︳21年來再有海關劇 袁偉豪黃智雯王敏奕夠唔夠孭飛?
把關者們.劇情︳21年來再有海關劇 袁偉豪黃智雯王敏奕夠唔夠孭飛?

本來估計TVB以家庭倫理劇《我家無難事》紀律部隊劇《把關者們》排陣,2款都係TVB擅長嘅劇種,又唔似《刑偵日記》玩創新玩到入唔到屋,有望秉承《七公主》同《智能愛人》嘅勢頭。點知2套劇開播成績都未如理想,《我》有19.3點,比起《七公主》平均21點、啟播20點有少許落差。而《把》首周嘅17.8點,頂多貼近《智能愛人》平均17.4點成績,但係《智》首周因讓路俾奧運節目而推遲至10點15分播出,收視被拉低至12.3點,先至得到呢個平均數,如果同奧運前嘅9點半劇集比較,就顯得有啲疲弱。

我家無難事︳原名有敏感詞要改?影后視后同台 馬德鐘父子檔上陣有睇頭
我家無難事︳原名有敏感詞要改?影后視后同台 馬德鐘父子檔上陣有睇頭

而Viu播由MIRROR成員姜濤及Anson Lo合演嘅台劇《超感應學園》,首周有3.3點,比前一周嘅韓劇《逆轉時機》只係多0.3點。配音劇加上只有6分1隊MIRROR嘅演出,似乎未必幫到收視。另一個由Lokman、Tiger、Alton同Frankie分別主持嘅《幫緊你應援團》,就同前周一樣保持3點收視。

值得一題係,周六晚上嘅各台收視情況。有分析認為當晚有林作對決鍾培生嘅話題拳擊賽,因此影響收視。睇返當晚TVB播嘅《杜麗莎的音樂沙龍》、《教煮爭霸》同《我要做業主2》,收視分別係12.4點、12點及9點,同前周嘅2線劇大結局比當然差得多,呢個數字對比一個月前嘅聲夢學員演唱會都跌1點左右,只係好過前周定位模糊嘅《兒歌金曲Summerfest》。反觀Viu播放紀念哥哥張國榮嘅電影《金玉滿堂》,取得4.7點收視,更勝前周有MIRROR+ERROR助陣嘅《水著考有Feel》。到底TVB星期六跌數,係因為「林鍾一戰」吸走收視,定係寧願觀眾轉台睇哥哥,又或者大批市民出外提早做節先搞成咁?

最後一個焦點︰頭2集收視唔錯嘅《思家大戰》,相隔一周後大跌2點至14.8點,李思捷係時候要諗諗計喇。

9月6-12日︳港姐決賽收視最高逾27點 《七公主》《智能愛人》結局周微跌

上周收視報告重點都係喺TVB度,因為有港姐決賽兼2線劇集《七公主》及《智能愛人》結局,反觀Viu嘅節目就未見有好大話題性。

先講港姐,決賽當晚直播收視24.5點,跨平台平均收26.1點,最高有27.4點,可以話係今年以來綜藝節目成績最好嘅一次。畢竟請到張學友壓陣的確有叫座力,加上今年佳麗水準唔錯,實力亦夠平均,有返以前睇港姐嘅感覺,難怪多人睇。同時段Viu嘅節目收視亦應聲下跌,向來係鎮台之寶嘅《健康要Fact Check》大約有3.5點,同港姐對撼之下得返2.5點,而Chill Club就更慘,得返1.5點。

七公主劇情︳女角主導家族恩怨劇 邊個姐仔脫穎而出?
七公主劇情︳女角主導家族恩怨劇 邊個姐仔脫穎而出?

過往劇集去到結局周都會收視反彈,不過本來成績唔錯嘅《七公主》同《智能愛人》反而臨尾回軟。《七公主》一至五晚收21.4點,比上周少半點;《智能愛人》就收18.4點,跌近1點。至於星期六晚結局篇,《七》有21.2點而《智》有19.3點,算係少少跌眼鏡。下一檔嘅《我家無難事》同《把關者們》都係TVB擅長拎收視嘅劇種,下星期就可以知道大台部署係咪成功。

幫緊你
幫緊你

Viu一至五焦點嘅綜藝節目呢期sell溫情味道,《甜爺爺》同前周差唔多有3點,接力《七救星》嘅《幫緊你應援團》未能食住個勢都係收3點。至於出動ERROR 同3分1隊MIRROR嘅《水著考有FEEL》有3.6點,比起前周同時段嘅《力圖打排球》跌1.5點。如果將《水》放星期日播,可能會比較上守得住收視。

8月30-9月5日︳TVB收復奧運失地 Viu再靠MIRROR食糊

上周(8月30-9月5日)三台收視成績公布,對TVB而言可以話係大半年來稍為值得慶賀嘅一星期。

《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》

兩線劇集《七公主》同《智能愛人》繼續有升勢,《七》有近22點而《智》亦微升至19.2點,算係今年少數2套劇都有唔錯收視嘅情況。煮食真人show《煮戰》都有增長至14.3點,證明解除「限廚令」係明智之舉,只要唔係清一色烹飪節目,觀眾絕對受落。

大台今年試咗唔少綜藝節目,不過除咗《聲夢傳奇》,大部份都食唔住個勢。估唔到被睇低一線嘅《思家大戰》,今個星期直播收視只係微跌0.1點。TVB仲特意公布埋《思》第一集(前周)跨平台收視有19.5點,以李思捷嘅觀眾緣嚟計算係有交代。而《暑假玩到盡》都彈升至17點。

不過都唔係個個節目有睇頭嘅,《代溝關注組》就跌近一點至12點,星期六晚嘅《兒歌金曲Summerfest》更慘只得11.7點,大概係近年籌款show嘅水平。《代》好似睇住班長輩廢吹,冇咩吸引力;《兒歌金曲》究竟係想俾家長睇,定係一班唔聽電視台兒歌嘅細路睇呢?

力圖打排球
力圖打排球

Viu上周焦點係MIRROR成員孭飛嘅《力圖打排球》,喺星期六晚取得5.1點成績。畢竟《力》齊集Anson Lo(盧瀚霆)、Edan(呂爵安)同 Ian(陳卓賢)3大人氣隊員,對家又出兒歌節目讓半臂,成功搶灘。而《七救星》最後一周升至4.2點,以Viu嘅水平絕對收貨,亦意味住七師傅同Viu會有更多合作。

8月23-29日︳《七公主》越升越有 《思家大戰》有驚喜李思捷搣甩乞人憎之名?

七救星
七救星

上星期(8月23-29日)收視報告,先睇Viu嘅成績,四個字「保持平穩」。

Viu嘅焦點節目往往係一至五十點半後兩線綜藝,上周播嘅《AH佛真.惜玩》同《七救星》同前周收視相若。《七》即使有網民口碑加持,但都係keep住喺4點左右。對比早前嘅《調教你MIRROR》甚至《大叔的愛》,估計如果冇MIRROR做賣點,Viu嘅節目收視基本盤大約有2-3點左右。嚟緊會出街嘅《力圖打排球》同《水著考有Feel》應該可以測試呢個推算。

七公主劇情︳女角主導家族恩怨劇 邊個姐仔脫穎而出?
七公主劇情︳女角主導家族恩怨劇 邊個姐仔脫穎而出?

TVB就開始擺脫被奧運拉低收視嘅狀況,兩線劇之中《七公主》微升至21點,隨住劇情開始緊湊應該仲有得上;《智能愛人》再升多1點至19點,李佳芯被盛讚有視后級嘅演出可能係因素之一。

綜藝方面,一至五十點半拆成2個節目,一至三嘅《煮戰》係TVB放寬「限廚令」之後首個煮食真人show。對比之前多個同時段綜藝大約10-11點收視,《煮戰》首周有13.7點收視算係唔錯。星期四、五嘅《代溝關注組》都有12.8點,但係觀乎節目話題嘅迴響,估計下周未必keep到。

另一個焦點放喺星期日《思家大戰》之上。雖然主持李思捷觀眾緣麻麻,但新登場遊戲節目總會有捧場客試睇,收16.8點可以話係有驚喜。《思》喺北美地區係長壽節目,如果問題再精準抵死啲(例如第一集就問「講出一個李思捷最乞人憎的地方」),李思捷又會調節主持風格的話,《思》可能比《開心大綜藝》更值得長線發展,亦可以幫李思捷搣甩乞人憎嘅標籤。

8月16-22日︳TVB同Viu 收視全靠「七」字?港姐準決賽成績突出

TVB公布本地三間電視台上周收視報告,唔講咁多即睇重點!

七公主劇情︳女角主導家族恩怨劇 邊個姐仔脫穎而出?
七公主劇情︳女角主導家族恩怨劇 邊個姐仔脫穎而出?

TVB今年黃金時段劇集表現麻麻,大半年來得《逆天奇案》稍為多人睇,而今期播放嘅《七公主》收視有驚喜,第2周直播收視有20.8點,連同跨平台點擊估計有24點,比起被視為新一代收視救星李佳芯主演嘅《智能愛人》(上周17.9點)更好。即使唔少人對於《七》女主角黃翠如表現大有意見,但係呢類恩怨情仇劇不嬲有市場,如果卡士更有驚喜唔搵「親生女」的話,絕對有望跑出。

七救星
七救星

無獨有偶,Viu都係靠「七」字撐起收視。之前多數做節目嘉賓嘅七仙羽師傅,今次孭飛首度主持《七救星》。雖然節目排喺11點播,但係師傅吸引力唔講得笑,首周收視有3.8點,對比前周同時段大賣女嘉賓身材嘅《海陸勁技場》(2.6點)多近一半人收睇,亦比起早半個鐘播、許廷鏗主持嘅《AH佛真.惜玩》(上周收視3.5點)更好。

收視報告︳TVB同Viu 收視全靠「七」?港姐準決賽成績突出
收視報告︳TVB同Viu 收視全靠「七」?港姐準決賽成績突出

上星期TVB一至五有港姐真人show We Miss HONG KONG STAY-cation / We Miss HONG KONG冠冕繼承者,收視分別有10.6及 8.8點,未見突出;但係星期日嘅準決賽就有18.6點,最高仲去到19.9點。TVB喺報告入面特別打星星標明,呢個成績係比奧運前4個周日同時段節目(《盛舞者》、2集《明星運動會》同《欺詐劇團》大結局)躍升5.1點。

睇返成日被形容為創新但成績慘不忍睹嘅《刑偵日記》,仲有各式新嘗試嘅綜藝節目,似乎TVB嘅觀眾對呢一波嘅新風格節目唔太受落,恩怨情仇劇同港姐呢類傳統嘢,先係佢地杯茶?

-----------

8月9-15日︳《七公主》救亡幫到手 Viu同開電視奧運後打回原形

上周(8月9-15日)收視報告紀錄奧運後各台成績,TVB雖然喺奧運節目上仍然取得全港6成以上收視,但係其他節目全面拖低,《刑偵日記》甚至成為多年來成績最差黃金時段自家劇。奧運過後,有冇起色?

上星期首播嘅《七公主》直播收視平均有20點,以TVB 5月底公布直播收視嘅成績嚟睇,呢個數字唔算標青︰同樣係以直播收視計算,之前播嘅《一笑渡凡間》首周有19.2點,《寶寶大過天》有22.5點,《七》只係比《欺詐劇團》同《刑偵日記》優勝。觀乎《七》呢種恩怨情仇劇,觀眾應該幾buy,估計之後收視有望上升。

而另一線劇《智能愛人》有17.5點,比起奧運嗰陣早咗大半個鐘播(由10點15分提早到9點半),收視亦都大升超過5點。以近年水平計當然未算最好,聞說坊間對套劇反應唔錯,同樣有機會後上。

綜藝節目方面,港姐真人show We Miss HONG KONG STAY-cation有10.7點,We Miss HONG KONG冠冕繼承者就得9.6點。10點半綜藝時段試咗唔同種類節目,成績都未如理想,難怪TVB要放寬「限廚令」,下星期出街嘅《煮戰》收視值得關注。至於玩水節目《開心大綜藝之暑假玩到盡》有15.8點,仍未重返《開心大綜藝》開播嘅2字頭。

AH佛真.惜玩
AH佛真.惜玩

對ViuTV而言上個禮拜係「見真章」嘅一周,因為係2個幾月以來冇MIRROR成員擔綱現身一至五黃金時段。由許廷鏗主持嘅《AH佛真.惜玩》有3點,算係不過不失;玩「獎門人」式水上競技嘅《海陸勁技場》得2.6點,有晒養眼女嘉賓搏命show身材都比唔上《阿女又戀嚟》同《積極到爆》,可能因為Viu觀眾唔多想睇到同大台形式近似嘅節目。

至於開電視嘅收視同奧運前差唔多︰一至五黃金時段普遍唔夠2點,《空間改造王》同《健康原因講多D》仍然係台柱。

8月2-8日︳《刑偵日記》全劇平均唔夠14點破開台紀錄 《智能愛人》輕微挽救劣勢

上星期(8月2-8日)收視報告公布,繼續有2個焦點︰TVB劇《刑偵日記》同奧運節目成績。上周一播出大結局嘅《刑偵日記》終於停住跌勢有11.7點收視,比前周平均10.2點明顯反彈。不過全劇平均收視大約13.8點,好大機會係TVB開台以來一至五黃金時段播放自家製劇集中最低紀錄。過往只有周末播放嘅劇集先會見到呢個數字,例如2008年嘅《盛裝舞步愛作戰》(星期日晚11點播放,平均14點)、2007、2014及2016年嘅《廉政行動》(平均17點)或者2019年嘅《機動部隊2019》(平均14點)。

智能愛人︳李佳芯演智能機械人 救唔救到TVB收視低潮?
智能愛人︳李佳芯演智能機械人 救唔救到TVB收視低潮?

至於接力嘅《智能愛人》,搵新一代收視救星李佳芯(Ali)出手又得唔得?頭4集成績係12.3點,當然唔算理想,不過遷就奧運而放喺10點15分播放,應該未見真章,今個星期調返去9點半時段之後,應該可以反映真實收視。

奧運直播時段方面,三間電視台上星期一至六晚間直播收視當中,TVB大約佔6成左右(一至五13.8點,星期六9.8點),而Viu及香港開電視嘅差距收窄,一至五兩台收視差不多係3.5點,可能係坊間對開電視評述有正評,令唔睇TVB嘅觀眾由Viu轉去77台。

TVB亦公布星期日晚奧運閉幕禮各台收視,無線翡翠台及財經資訊台合共取得6成7收視(翡翠台16.2點、財經資訊台3.9點);Viu有MIRROR出動收5.6點,佔19%;有線合共錄得4.1點(開電視收視4點)。

7月26日-8月1日:《刑偵日記》險守10點收視 播奧運對TVB有冇著數?

今次收視報告相對簡單,因為三個電視台黃金時間都係直播奧運賽事,下面個表可以睇到各台奧運節目平均收視︰

頻道\收視

星期一至五

星期六

星期日

TVB

14

12.7

12.6

ViuTV

4.7

5.4

4.2

開電視

2.5

1.9

4.2

體壇盛事當然要跟到足,不過對TVB而言,一至五黃金時段14點嘅收視成績,反而比以劇集+綜藝嘅排陣遜色。更慘嘅係由於要遷就賽事,收視台柱《東張西望》同《愛.回家之開心速遞》都跌至15點或以下,比平時穩收20點少成4分1。

張家朗金牌戰有近210萬觀眾於電視直播收看
張家朗金牌戰有近210萬觀眾於電視直播收看

不過上星期幾場奧運焦點賽事,包括張家朗奪金嘅男子花劍決賽、何詩蓓奪銀牌嘅女子100米自由泳決賽、中國對中華台北嘅女子羽毛球單打決賽,TVB都穩佔超過6成收視。其中張家朗奪金之戰,TVB收20.2點,Viu有8.9點,而開電視有2.9點。雖然呢場比賽Viu嘅收視更勝《大叔的愛》,但係論比率仍然由TVB大幅領先。

另外,唔少觀眾都大讚開電視奧運節目評論最專業,連帶星期日晚嘅直播收視都同Viu打成平手,值得鼓舞。

收視節節下跌嘅TVB劇《刑偵日記》,一如所料因為延至10點15分播而影響收視,結局周只得10.2點,險守雙位數。雖然大結局星期一先播,但綜觀全劇每周平均直播收視只有13.8點,即使計埋跨平台收視都應該好大機會成為今年包尾,甚至係近5年最差。

Viu喺奧運期間繼續推綜藝節目,《阿女又戀嚟》保持平穩有3.8點,新節目《積極到爆》有3.6點,成績尚可。

7月19-25日︳TVB奧運開幕禮擸7成2收視 《刑偵日記》跌到11.4點或成墊底劇

收視報告︳TVB奧運開幕禮擸7成2收視 《刑偵日記》跌到11.4點或成墊底劇
收視報告︳TVB奧運開幕禮擸7成2收視 《刑偵日記》跌到11.4點或成墊底劇

上周收視報告重點一定係奧運節目表現,畢竟播嘅內容大同小異,正正顯示到各台基本觀眾有幾多。星期五晚嘅開幕禮,TVB平均取得14.2點直播收視,搵MIRROR 同ERROR撐場嘅Viu有5.3點,至於開電視就有1.3點。根據CSM媒介研究公布,計算全港直播開幕禮嘅頻道整體收視<TVB翡翠台及J2、Viu(99台)、開電視及國際財經台>,72%觀眾選擇收睇TVB。所以即使同日嘅屯門商場Viu宣傳活動幾咁墟冚,TVB嘅影響力仍然不容忽視。

至於周六日黃金時間賽事直播,TVB收13點(周六)及11.6點(周日),Viu收4.1點(周六)及3.7點(周日),開電視收2.2點(周六)及2點(周日)。對TVB而言奧運直播收視比自家綜藝節目差少少,但對Viu及開電視而言就算係唔錯。

收視報告︳TVB奧運開幕禮擸7成2收視 《刑偵日記》跌到11.4點或成墊底劇
收視報告︳TVB奧運開幕禮擸7成2收視 《刑偵日記》跌到11.4點或成墊底劇

由於《寶寶大過天》播完,又無理由8點半時段喺奧運前播新劇,TVB將上星期一至四改以綜藝節目主打,星期一晚《聲夢傳奇》決賽收23.9點算係驚喜,不過其餘幾晚嘅節目就麻麻,只有食住《聲夢》餘勁嘅《傳奇誕生》有17.1點較好,《明星運動會》及《全城迎奧運》只有14.3及11.5點。

而本身收視麻麻嘅《刑偵日記》因為讓路俾奧運,調至10:15分先播,果然一如所料影響收視,再由前周14.2點跌至11.4點,下星期有可能跌至接近10點歷史新低,亦好大機會會成為全年收視墊底劇。

Viu方面,《大叔的愛》同《納米無明火》播完,接力嘅《大叔的愛》日版及《名女又戀嚟》都有約4點收視,算係保住基本盤。

7月12-18日︳《大叔的愛》結局破紀錄 《刑偵日記》再跌得返14.2點

《大叔的愛》大結局
《大叔的愛》大結局

上周收視報告焦點梗係睇ViuTV《大叔的愛》結局篇成績如何,同埋打對台嘅TVB《刑偵日記》能否止住跌勢,結果果然唔意外。

《大叔的愛》第3周收視有7.9點,係5月底公布直播收視以來Viu嘅最高紀錄。全劇播出3周收視都拾級而上,如果Viu公布埋包括網上重播嘅跨平台收視,可能會更有驚喜。相反《刑偵日記》就連跌3周,最新直播收視係14.2點,相信TVB內部都會唔多滿意,估計計埋跨平台收視可能都係貼近20點,以惠英紅、姜皓文同王浩信呢個卡士,呢個成績更加唔「靚仔」。而TVB擅長嘅小品式劇《寶寶大過天》結局周平均有22點,全劇平均就有約22點(直播收視),加埋跨平台收視的話,以今年計已經算唔錯。

TVB銳意創新但觀眾唔領情嘅例子仲有《盛.舞者》。一至五十點半嘅收視由10.3降至8.6點,星期日決賽收視得12.3點,比前周《明星運動會》大跌近5點,拖累隨後嘅《勁歌金曲》都失守10點收視得8.8點。至於進入決賽前最後一集嘅《聲夢傳奇》就突破17點水平,上星期有18.2點,估計決賽收視有望超過20點。

由《擊戰》衍生嘅音樂特備節目《夏日有團伙 擊戰一場》或者受《聲夢》影響,收視只有1.7點。而《納米無明火》受《大叔的愛》及口碑帶動下,上周收視升至5點,比《調教你MIRROR》最後一周更好,果然講住屋嘅節目係有保證;至於另一套一至五綜藝《生存演技派》微跌至2.7點。

今個星期TVB配合奧運而將一至四黃金時段播放綜藝,《刑偵日記》就調至10點15分先播,睇怕收視有機會再向下。而Viu就有日版《大叔的愛》接力港版,再加些少港版演員訪問嘅SP,未必能再下一城。

7月5-11日 -《刑偵日記》再跌得15.5點 《大叔的愛》再創新高

《刑偵日記》劇情︳又一套查案劇 驚慄風格+惠英紅夠唔夠贏《大叔的愛》?
《刑偵日記》

TVB公布咗上星期(7月5-11日)嘅收視,對大台嚟講成績可謂乏善可陳。

先講下唔少傳媒大讚、但係網上唔算多人講起嘅《刑偵日記》,第2周直播收視再跌至15.5點,比上星期跌2點。自從5月底TVB公布直播收視以來,《刑偵日記》暫時成績算係最差。據知《刑》第一周跨平台重溫收視有20.5點,換言之比直播收視多3點,假如呢個數冇變,第2周連同跨平台收視只有18.5點,隨時比今年包尾嘅《大步走》更差。相反《寶寶大過天》繼續保持平穩有22.1點,應該順利過關。

綜藝方面,接檔《識貨》10點半時段嘅《盛.舞者》未能承接收視,比前周跌2點至10.3點。《明星運動會》大致相若有17.1點,反而口碑不俗嘅《單對單》收視逐級落,上周第3集只有12點。

《大叔的愛》
《大叔的愛》

至於Viu,焦點固然係《大叔的愛》,第2周收視再升半點至6.9點,係公布直播收視以來Viu嘅最高成績。預計下星期結局篇應該仲有得去,加埋跨平台收視可能過10點。上周開播嘅《納米無明火》出人意表地有4.5點收視,比之前嘅《嫌疑事件簿》高出1點。而11點時段接《調教你MIRROR》嘅《生存演技派》有2.9點,冇咗《調》嘅粉絲效應,跌數可以預期。

Viu同香港開電視嘅健康同樓盤資訊節目繼續扮演鎮山之寶,Viu嘅《健康要Fact Check》有3.7點係周日晚間最高收,開電視《空間改造王韓國篇》同《山旮旯睇樓團》都係周末高收節目。TVB與其參考其他地方嘅綜藝節目,倒不如先將J2王牌《安樂蝸》調出翡翠台啦。

6月28日-7月4日︳《大叔的愛》吸一倍收視 超強卡士《刑偵日記》首周仆直

上星期三間電視台嘅收視成績揭盅!最多人想知嘅應該係ViuTV同TVB嘅新劇大戰,第一周到底鹿死誰手?

有惠英紅、姜皓文同王浩信孭飛嘅《刑偵日記》,睇牌面點都唔輸蝕俾暫時最高收視嘅《逆天奇案》,不過首周收視令人大跌眼鏡,只有17.5點,比上星期嘅《欺詐劇團》好少少。由於TVB 5月下旬開始只係公布直播收視,難以同之前嘅跨平台收視作比較,不過估計連同網上及其他收看渠道,《刑》開播成績最多都係接近20點,實在出人意表。當播到第3周嘅《寶寶大過天》都有21.5點,你就明白《刑》個勢有幾危。

《大叔的愛》第6集劇情
《大叔的愛》

相反《大叔的愛》就有6.4點收視,比之前報導所講第一集有8點收視有差距,但係以Viu平日黃金時段成績計算,已經係突飛猛進,比起上周同檔嘅《造美人》更加係多咗一倍。

另一條戰線10點半綜藝檔,TVB嘅《識貨》有起色升到12.3點,而Viu嘅《嫌疑事件簿》都出現反彈有3.4點。至於最後一周嘅《調教你MIRROR》亦回升到4.5點埋個靚尾。周末綜藝方面,《聲夢傳奇》繼續保持17點收視,同時段Viu嘅《造美人總決賽》有4.3點,比前周播電影《麥兜故事》嘅收視更好。周日TVB以《明星運動會》頂替《開心大綜藝》,有16.9點收視,算係回一回氣。

6月21-27日 《調教你MIRROR》繼續跌 《欺詐劇團》收視暫列全年包尾

今次收視報告先睇TVB情況。一至五黃金時段有2個新節目出街,一星期播晒嘅《欺詐劇團》承接收視麻麻嘅《一笑渡凡間》。上年TVB推出《香港愛的故事》有口碑有收視,觀眾對短劇有所期待,加上陣容同故事有新鮮感,本來以為收視唔錯,點知直播收視率只有15.6點,星期日2小時大結局得14.8點。估計連同網上平台收視,都可能唔及《大步走》,成為年度收視墊底劇。至於8點半嘅《寶寶大過天》收22.4點,同前周差唔多。

另一個新節目《識貨》就略略挽回前一檔《死因有可疑》嘅收視,有10.6點當然唔算好,更值得正視係將晚間新聞推遲至11點15分之後,拖累新聞收視下跌,似乎大台要考慮係咪繼續要咁編排。

星期六播嘅《聲夢傳奇》收17點,大致維持水平,而訪談節目《單對單》反而有驚喜,有13.5點。呢類節目TVB做唔少,會唔會考慮將J2嘅Mean Talk搬過翡翠台播?(係嘞,點解Mean Talk呢個名同風格,同YAHOO TV做咗3年嘅《Mean傾》咁似嘅?)

Viu方面今周有啲疲態,《調教你MIRROR》第3周收視再跌至3.8點,比起首周5.4點少左差唔多3分1,或者因為剪接編排令節目冇咩追看性,而且觀眾期望睇到更多「鏡仔」真情剖白,點知除咗AK同Jer道歉嗰集比較入心之外,其餘都係似綜藝多過真人show,難怪觀眾放棄。

同TVB對撼嘅《嫌疑事件簿》進入第2周,收視由3.6點下跌至2.2點,相信呢類「燒腦」節目仍未為觀眾接受,又或者同箇中橋段未夠精準有關。 「鎮台之寶」《健康要Fact Check》有3.7點,保持平穩。

至於香港開電視收視仍然乏善可陳,《空間改造王》繼續係全周最高收,有4.1點。其餘節目都係1-2.7點左右。

下星期收視報告焦點係TVB嘅《刑偵日記》大戰Viu《大叔的愛》,有惠英紅同姜皓文助陣嘅《刑偵》,能否超越《逆天奇案》成為今年收視之冠?《大叔的愛》又可唔可以帶起Viu成個黃金時段?

6月14-20日︳推理節目對撼兩敗俱傷 TVB《死因有可疑》10點都冇

今個星期直播收視報告焦點,自然係TVB同ViuTV同時段推出同類推理綜藝節目,到底邊個贏邊個輸。答案係大家都輸!

TVB嘅《死因有可疑》只有9.5點,對比前一星期跌咗近2點。以大台10點半綜藝節目嚟講,可以話係強差人意。俾個參考數字大家,之前以疫情生活為題材嘅《500日後》同《我在隔離的日子》,分別有11.4及12.7點,呢類小品題材反而比更花費人力物力嘅推理綜藝更好成績,都幾跌眼鏡。

至於Viu嘅《嫌疑事件簿》就有3.6點,比起上一檔嘅《中女唔易做》都跌咗3分1。不過由於首周成績唔錯嘅《調教你MIRROR》上星期都跌一點收4.4點,《嫌》或者都係受拖累影響成績。但係2個台由本身耍家嘅模式,轉去拍新嘗試嘅推理綜藝結果反應麻麻,唔止節目質素同韓國、內地嘅比較後立見高下,觀眾口味都係值得留意嘅因素。

另一焦點係TVB新劇《寶寶大過天》,首周收視22.5點,估計連同網上收視大約有24點,算係不過不失,對比前一檔戰績彪炳嘅《逆天奇案》當然比下去啦。第二線劇集《一笑渡凡間》結局周收視18.7點,同上周差唔多,相信整體平均收視同反應麻麻嘅《大步走》差唔多。

反而剛過去周日TVB黃金時段收視有返起色,《東張西望》同《愛.回家之開心速遞》重返20點以上,《開心大綜藝》升2.3點貼近18點,《勁歌金曲》亦都多咗18萬人收看。

Chill Club A New Stage
Chill Club A New Stage

Viu方面,星期六晚播、有Serrini、林二汶、Gin Lee、姜濤、林家謙、陳卓賢(Ian)演出嘅Chill Club A New Stage有2.9點,比前一周播歐洲國家盃賽事為低,亦對同時段嘅《聲夢傳奇》只有少許威脅。《聲》收16.6點跌半點。

6月7-13日 - 《調教你MIRROR》帶挈收視升一倍 《一笑渡凡間》繼續疲弱

TVB公布上星期三個電視台嘅直播收視報告,我地逐個台講下先!

先睇Viu,上個禮拜有萬眾期待嘅《調教你MIRROR》開播,果然不負眾望,收視有5.4點,比起上一檔由金剛主持嘅《掃街達人》升一倍;連帶排喺《調教你MIRROR》前面、10點半播嘅《中女唔易做》,都多咗一倍觀眾,甚至險勝《調》有5.5點,成為全周收視之冠。另一個綜藝節目《造美人》反應都唔錯,有3.2點收視,比前一檔嘅韓劇《優雅的朋友們》高出近一倍。而上星期六直播歐洲國家盃賽事都有3.4點收視。

香港開電視上周收視同前周比差唔多,周一至五黃金時段收視維持喺0.3-1.6點左右,周末嘅外購節目繼續係收視保證,《健康原因講多D》同《空間改造王》分別有2.8及 4.1點。

至於TVB,上星期進入結局周嘅《逆天奇案》有24.9點,相信加埋網上串流數字,應該會係今年暫時最高收視劇集。月尾播嘅《刑偵日記》有輥英紅加王浩信呢個視帝視后組合,有力挑戰寶座。另一線劇集《一笑渡凡間》開擋以來直播收視都過唔到20點,上星期再跌半點至18.6點,可能會同《大步走》力爭今年包尾。

今年大台力谷嘅綜藝節目,《開心大綜藝》休息一周之後未有起色,收視再跌至15.6點,比起前周由《好聲好戲》學員配音嘅西片《侏羅紀世界》更差。多得參加者比賽片段引起收睇意慾﹐開始多人談論嘅《聲夢傳奇》收視升1點到17.1點,似乎漸入佳境。

下個禮拜可以留意,TVB同Viu2個正面對撼嘅查案節目,到底收視如何。被指節奏緩慢嘅《調教你MIRROR》,進入第2周又能唔能夠再上一層樓?

———————————————————

5/31 - 收視報告4大改動 Viu播《英雄本色3》最多人睇 《一笑渡凡間》開播唔過20點

以往TVB都係隔個禮拜先公布收視成績,殊不知今個星期開始,公布嘅資料有幾項大改動 -

1)加入ViuTV及香港開電視嘅收視成績

2)只係計算直播收視資料,冇包括各頻道於家外媒體及網上平台7天收視

3)剔除澳門收視

4)公布剛過去一周節目收視,而唔係前周

最新一份收視報告紀錄5月24至30日成績,5月10-23日嘅數字就未有公布,撞正呢段時間播放嘅ViuTV人氣節目《ERROR自肥企劃》就難以得知收視。

先講Viu同開電視表現,Viu全周最高收視係星期六播嘅電影《英雄本色III夕陽之歌》,有4.7點收視。另一高收節目就係外購嘅《健康要Fact Check》,有3.8點;至於旗艦音樂節目Chill Club就有3.2點排第3。向來星期一至五收視會比周末高,但係Viu平日嘅綜藝節目反而被比下去,《中女唔易做》同《掃街達人》分別有2.3及2.7點,而用作對撼《囝囝女女730》更不足1點。TVB副總經理曾志偉曾經話Viu 收視得4點,只可以同J2相比,睇嚟此話不假。但係上星期並冇Viu嘅風頭躉MIRROR ERROR嘅節目,下星期《調教你MIRROR》出街可能又會有唔同局面。

開電視方面,黃金時段節目普遍唔超過3點,最高收視節目係星期日晚播放嘅外購節目《空間改造王》,有4.4點。而同Viu《健康要Fact Check》類似嘅日本節目《健康原因講多D》有2.9點,都係稍為多人收看嘅節目。

至於TVB,上周首播嘅劇集《一笑渡凡間》有19.2點,估計加埋網上收視成績都唔算突出;另一線劇《逆天奇案》第4周收視23.1點,對比首周總收視26.2點有所下跌。《開心大綜藝》有17.6點,《勁歌金曲》有12.1點,相信總收視都唔會有太大驚喜。因為唱《一事無成》「鼓勵」失業人士嘅慈善show《萬眾同心公益金》有13.7點,唔係有呢個「安排」可能都唔多人留意個節目。

——————————————

5月3-9日︰陳展鵬3年來首套新劇 造就《逆天奇案》首周高開

陳展鵬新劇《逆天奇案》 賣點竟然係客串陣容 雙影后加視后仲有呢班稀客
陳展鵬新劇《逆天奇案》 賣點竟然係客串陣容 雙影后加視后仲有呢班稀客

5月首周收視出爐!呢個禮拜最大亮點係陳展鵬同黃智賢主演嘅新劇《逆天奇案》首周成績。可能因為係煎pang3年來首套新劇,第一個禮拜嘅收視高開26.4點,應該係今年開播新劇暫時最好嘅成績,比前一檔嘅《愛美麗狂想曲》結局篇高接近2點,甚至力壓「收視台柱」《愛•回家之開心速遞》成為一周最高收節目。

伙記辦大事 ︳TVB搵收視福將救亡 歐陽震華都失過手 呢套重頭劇成績麻麻
伙記辦大事 ︳TVB搵收視福將救亡 歐陽震華都失過手 呢套重頭劇成績麻麻

平日黃金時段另一套查案劇集《伙記辦大事》,呢個星期出現反彈收23.4點,有觀眾話劇情去到最後階段先入局,或者有助推動收視,但係恐怕有群星客串嘅《逆》珠玉在前,《伙》莫講話打爛歐陽震華收視保證,仲可能連《愛》嘅收視都挑戰唔到。

綜藝節目方面,一至五十點半新推出嘅《好聲好戲》有驚喜,首周有19.4點,比勞師動眾嘅《大整蠱》更好。周末嘅《聲夢傳奇》同《日日媽媽聲》同前周大致相同,分別有16及14點左右。旗艦節目《開心大綜藝》前周反彈後又回軟,跌至播出以來新低嘅18.6點。《勁歌金曲》亦都微跌至11.6點。

----------

4月26至5月2日︳《愛美麗狂想曲》爆冷成今年劇集冠軍 《伙記辦大事》拆歐陽震華收視福將招牌?

TVB最新公布4月26至5月2日嘅收視,亮點喺邊?即刻數!

嗰個星期《愛美麗狂想曲》播出大結局,全周平均有24.5點收視,並以全劇30集取得平均23.8點收視,暫列2021年最高收視劇集榜首位置。綜觀全劇收視走勢,頭15集成績唔算特別,第3周更一度跌到22.7點,但係後半段有驚喜企穩24點以上,以一套喺串流平台播完先出街嘅劇集嚟講,絕對出奇。

反觀被寄予厚望嘅《伙記辦大事》,收視竟然越播越跌,該周只有22.3點,比起首周創今年紀錄嘅24.7點,足足流失15萬觀眾。向來歐陽震華拍查案劇都係收視保證,連古裝嘅《洗冤錄》都跑出,今次《伙》成績麻麻,或者同劇情行咗一半都仲未入局有關。下次TVB再用Bobby,似乎要度一度橋。

至於呢期力谷嘅綜藝節目又點?《開心大綜藝》止跌回升有20.8點之外,其餘幾個節目都未如理想。一至五嘅《大整蠱》跌1點收17.2點,星期六《聲夢傳奇》亦跌1點左右收16.3點,《日日媽媽聲》大致平穩不過都只有14點。銳意改革嘅《勁歌金曲》仲慘,跌到11.9點,穿埋《流行經典50年》嘅低位。

4月19-25日︳革新綜藝冇成果?《開心大綜藝》《大整蠱》收視不濟

今個禮拜睇睇4月19-25日TVB收視成績,綜藝節目繼續係焦點,不過好似唔多理想!

嗰個禮拜日對台Viu冇大型節目,但係旗艦節目《開心大綜藝》第3集收視再跌,該周只有19點,比前一周再跌1點。嗰集最多人講嘅係Supper Moment同胡楓合唱,綽頭有限。十分緊張《開》嘅曾志偉,係咪要諗吓計點樣谷?另一個大鑼大鼓改革嘅節目《勁歌金曲》,新形式第2集收視亦都係下跌,只有12.2點,比起為人詬病嘅《流行經典50年》天不濟,好大可能係TVB觀眾始終年長者居多,佢地寧願聽「靚歌」「靚聲」都唔要勁歌。

開心大綜藝
開心大綜藝

「九大綜藝」節目之一嘅《大整蠱》嗰個星期接棒《尋人記》,收視同樣得到唔算理想嘅18.2點,比起《尋》十集平均收看人數減少26萬。雖然《大》製作同橋段算幾認真同新穎,但《尋》珠玉在前,而且整蠱節目唔算新穎,可算生不逢時。

另外2個星期六晚播放嘅節目都唔見得好幾多,《聲夢傳奇》收17.2點,同上一集差唔多,而《日日媽媽聲》就急跌至14.1點,估計暫定做8集嘅《日》應該冇咩機會添食嘞。

劇集方面,2線劇都有下跌,但係勢估唔到《愛美麗狂想曲》仲可以企喺24點水平,如果結局周keep得到,好有機會成為暫時今年嘅劇集收視王。反而被譽為「救亡之作」嘅《伙記辦大事》第2周就跌近2點至22.8點。當然《愛.回家之開心速遞》仍然係MVP,而且由前幾周嘅頹勢慢慢恢復,收25.3點。

總括而言,由綜藝到《伙記辦大事》暫時嘅「有頭威冇尾陣」情況可見,度咗條大橋、藝人配搭新鮮加埋宣傳,只係吸到第一「浸」收視。要維持個勢,內容水準仲係好緊要。

4月12-18日︳《伙記辦大事》《尋人記》創新高 Chill Club頒獎禮拉跌《開心大綜藝》收視?

TVB最新公布4月12-18日收視,對大台嚟講呢個星期成績好壞參半,即睇!

首先嗰個星期係新劇《伙記辦大事》首播周,有「收視福將」歐陽震華再加一段時間未拍TVB劇嘅馬德鐘兼萬綺雯,有實力又有新鮮感。果然《伙記辦大事》不負眾望,首周有24.7點收視,暫時成為今年開播最高收視劇集,對比前一檔《大步走》,觀眾人數大幅反彈30萬。

而開播成績同樣唔錯嘅《愛美麗狂想曲》,雖然前一周收視回軟,但係該周又再回升,仲去到24.6點,係播出以來最好嘅一個星期。以今年劇集暫時成績比較,《愛美麗》應該有望做住一排收視冠軍。

另一個好成績節目係《尋人記》,第2周有23.2點,亦都比前周好,而全個節目取得22.8點收視,係去年2月以來同一時段(晚上10點半)收視之冠。TVB要唔要搞個慶祝活動,叫方東昇去觀塘音樂噴泉沖涼?

咁又有咩壞消息呢?呢個星期出街嘅《開心大綜藝》,撞正ViuTV 《Chill Club 推介榜年度推介20/21》。雖然大台加鐘正面對撼,不過《開心大綜藝》收視由前周23.7點跌至20.1點,流失超過23萬觀眾。雖然ViuTV冇正式公布Chill Club頒獎禮收視,但係曾志偉可能真係要留意吓對家呢個「只可以同J2比較」嘅頻道,會唔會已經有威脅了。

另一個隱憂係TVB大鑼大鼓宣傳嘅綜藝節目,第2周收視都開始走樣。《聲夢傳奇》由19點跌至16.9點,《日日媽媽聲》由17.4跌至15.8點,前者嗰集更加係有淘汰參加者,咁都吸引唔到觀眾追睇,有關方面頭痕嘞。

開心大綜藝
開心大綜藝

4月5至11日︳《開心大綜藝》高收《尋人記》帶挈收視升近5成

TVB最新公布4月5至11日收視,呢個星期看點唔少,逐個同你拆!

曾志偉上任後,唔少全新綜藝節目都喺呢個星期出街。先睇星期日重頭節目《開心大綜藝》成績,TVB都知係焦點所在,所以翌日已經公布收視有22點。而加埋跨平台總收視就有23.7點。比起上星期嘅《聲夢前傳》同《流行經典50年》(前半小時)平均17點大幅上升。另一個因為曾志偉上場而大搞嘅節目《勁歌金曲》,收視就比較令人失望,只有13.8點,對比《流行經典50年》早前嘅低位更差。

星期六都有2個新綜藝節目出街,選秀節目《聲夢傳奇》有18.2點,不及前一周播電影《證人》。不過選秀節目往往要去到比賽中後段先至多人注意,到時收視或者會上升。而余安安、羅敏莊及陳凱琳主持嘅訪談節目《日日媽媽聲》,目標清晰專攻婦女,喺星期六夜晚十點呢種時段有17.4點收視算係咁。

尋人記
尋人記

至於該周星期一至五晚就有《尋人記》登場,以往「新聞gag王」方東昇主理嘅軟性新聞節目都有捧場客,今次唔再出國採訪拍見聞,反而更有新鮮感,錄得22.3點收視甚至比台柱《東張西望》更好。對比上一檔節目《你又估我唔到》,同時段收視更加反彈近7點,觀眾人數大約多5成!

綜藝強勢,更見劇集乏善可陳。《大步走》結局周未能一如前幾套劇咁爆seed彈升,20.1點收視只比前一周微升,全劇平均收視亦唔過20點,暫時成為年度包尾。而第一周表現唔錯嘅《愛美麗狂想曲》,呢個星期收視跌至22.7點。就連《愛•回家之開心速遞》都近況回軟,全周冇一日過25點。即管睇吓被寄予厚望嘅《伙記辦大事》會唔會做到嘢啦!

3月29至4月4日︳《大步走》終於發力貼近20點 《流行經典50年》埋尾迴光反照

最新一份TVB收視報告出爐,日期係3月29至4月4日,雖然中間係長假期,但收視唔似過往咁因為觀眾外遊而下跌。

播到第4周嘅劇集《大步走》低迷過後終於有少火起色,收視有19.8點,貼近20點及格線少少。但係睇返幾個禮拜嘅成績,平均收視都係少過20點,似乎要靠結局周谷一谷先可以避免包艇。

上一周首播嘅《愛美麗狂想曲》同《大步走》都係喺TVB網上平台播放過再推出,不過成績好得多,第2周收視23.5點,只係比之前微跌。喺劇情冇咩新意嘅情況下,李佳芯靠觀眾緣都幫到收視,云云花旦之中Ali的確值得多啲機會……咁當然《愛美麗狂想曲》有「年青人偶像」曹永廉同蝦頭談情說愛,都係賣點……啩。

2大收視之寶《東張西望》平日keep住22點水平,反而「重頭劇」《愛•回家之開心速遞》近幾個禮拜稍為回軟,今個星期有24.7點,比起上2個星期流失大約8萬觀眾。另外喺該個星期六晚因為廖啟智逝世而播放嘅電影《証人》,收視有18.8點,比慈善show或者播演唱會更好,大台可以考慮星期六播電影,好過身水身汗搞綜藝。

點解咁講?該星期日播放選秀節目《聲夢傳奇》熱身篇《聲夢前傳》,收視有17.3點,比起小本經營嘅《港產旅行團》同《香港原味道》更遜色。如果正式出街收視都係咁上下,最驚嘅應該係一班參賽者。而去到「大結局」嘅《流行經典50年》,可能用「最後一集」呢個綽頭有吸引力,收視反彈到17.1點,比起前兩周嘅低位14.3點大幅反彈。家燕姐可以放心去湊孫啦~~

3月22至28日︳《愛美麗狂想曲》爆冷成今年開播最佳收視 《大步走》繼續跑唔郁

今次收視報告日期係3月22至28日,嗰個星期嘅亮點係半新劇《愛美麗狂想曲》首播。稱為「半新劇」梗係有原因,因為《愛美麗狂想曲》一早已經喺網上平台串流播放﹐今次只係電視首播而已。不過首周表現居然有驚喜,收視有23.6點,以0.2收視點力壓《陀槍師姐2021》,係今年開播成績最好劇集。雖然《愛》題材唔算新穎,但係有觀眾緣唔錯嘅視后李佳芯坐陣,而且唔少宣傳都力sell Ali露背場面,算係爆個小冷跑出。

嗰個禮拜10點半綜藝時段都係有新節目上場,由阿Bob同張秀文主持嘅《你又估我唔到》臨時頂替原定嘅《諸朋好友2》,但係對收視似乎冇幫助,《你》首周得14.1點,比起之前嘅《天天開運王》跌1.5點。清談節目其實更有叫座力,J2嘅Tiger’s Talk收視唔錯已經反映呢點,而且《你》嘅環節唔見得有幾出眾,似乎高層打錯如意算盤。

另一線劇 《大步走》仍然未有發力之勢,第3周收視跌返落18.6點,距離合格水平20點都幾遠。唔少觀眾都認為《大步走》以長跑做賣點,但係劇情又係愛情+連串誤會,同跑步冇咩關係。不過近期好幾套劇集都係最後一周表現反彈,或者《大》最終都會彈返上20點,即使係咁都好難避免成為年度收視包尾劇。

3月15-21日︳《失憶24小時》結局週發力 《流行經典50年》越做越頹

TVB最新公布3月15-21日嘅收視,嗰個禮拜嘅焦點係《失憶24小時》結局成績。《失》前20集收視徘徊喺22至23點之間,照理結局唔似有咩起色,但係勢估唔到21-25集平均收視有24.4點,星期六播嘅大結局都有23.4點,雖然未能去到《陀槍師姐2021》大結局25.8點嘅佳績,但係整體計已經算今年暫時收視最好嘅劇集。至於首周低收嘅《大步走》,去到第2周稍有起色收19.1點,但係仍未過「安全線」20點。今年TVB兩線劇收視都嚟個尾段發力,《大步走》又會唔會有同樣情況?

向來星期六收視都會麻麻,最多有之前播吳孟達作品能夠稍為谷起收視。但係嗰個星期六(3/20),竟然連《東張西望》都不足20點收視,另一台柱《愛•回家之開心速遞》亦都只有22.5點,難怪曾志偉上場要推一大堆綜藝救亡。

而即將收檔嘅《流行經典50年》,好似自從傳出4月唔再播之後,收視逐個禮拜「落樓梯」!最新成績係14.3點,再跌半點,唔知到最後一集會有幾多呢?

3月8-14日︳《大步走》開播 收視大暴跌 三大公司歌手亮相救唔到博愛show收視

【大步走】長跑藝人 5字頭林海峰堪稱全港最快 邊個3小時7分跑完全馬?
【大步走】長跑藝人 5字頭林海峰堪稱全港最快 邊個3小時7分跑完全馬?

今個星期睇吓TVB3月8-14日嘅收視,呢個星期有陳山聰、姚子羚主演嘅《大步走》開播,上一檔嘅《陀槍師姐2021》本來收視平平,去到尾段先大爆發,大結局仲有近26點收視。但係《大步走》就未能食住個勢,相反仲差強人意,只係得18.8點。黃金時間劇集唔過20點,基本上已經唔合格,而且仲要比配音劇成績更曳……可能鍾意跑步嘅都落咗街跑步,冇睇啩。

另一套黃金時間劇集《失憶24小時》有23點,繼續喺22-23點之間徘徊,未知結局周會唔會有驚喜嘞。上個禮拜提到,2大台柱《愛•回家之開心速遞》同《東張西望》平日一至五收視已經連跌3周,呢個禮拜終於喘定,《東張》有22.4點,《愛•回家》有25.4點。至於開播以來收視麻麻嘅《天天開運王》,再創新低得15.5點,但係最尾一集介紹關之琳億萬豪宅,可能引起觀眾注意,等睇下個禮拜收視報告。

《博愛歡樂傳萬家》
《博愛歡樂傳萬家》

前2個星期六晚都播吳孟達+周星馳作品,收視十分出色,呢個星期就有慈善show《博愛歡樂傳萬家》。今次《博愛》係3大唱片公司同TVB破冰之後首個大騷,3大都各自安排咗歌手參與,唔再只得星夢幫,不過節目收視只有13.9點,比起前一周重播《逃學威龍》大跌近7點。照咁睇,即使歌手卡士強咗,但係節目新意欠奉,怕且TVB要靠搞起音樂節目谷收視並唔容易。而已知會摺埋嘅《流行經典50 年》再跌到得返15點唔夠,難怪要斬!

3月1至7日 - 重播《逃學威龍》再破紀錄 《陀槍師姐2021》結局爆升

今個禮拜同大家睇下3月第一周嘅收視成績。嗰個禮拜嘅重點,係收視一度每況愈下嘅《陀槍師姐2021》,去到結局周有冇起色。前一個禮拜出現反彈之後,最後5集收視再度上升,平均有23.6點,大結局更加有25.8點,可以話係出人意表。不過拉勻計,全劇收視難以同前4輯《陀槍師姐》相提並論,會唔會再開續集?可能要搵返歐陽震華+滕麗名先得!

另一套一至五黃金時段劇集《失憶24小時》,第3周收視22.3點,比上周稍跌。《失》播咗3個禮拜都係徘徊喺22-23點之間,成績同外購配音劇《燕雲台》差唔多,有齊郭晉安+譚俊彥呢個組合竟然得呢個成績,有啲失望喎。

前一周吳孟達逝世當晚,重播電影《審死官》錄得18點收視,打破TVB3年來周末電影時段收視紀錄。呢個星期重播另一套達哥經典《逃學威龍》,收視更勝一籌有20.6點,比《審》多2點。

逃學威龍
逃學威龍

曾志偉上場之後,有傳做咗3年幾嘅《流行經典50年》可能4月就要摺埋。睇返收視成績,《流》又真係幾流。前2集得16點,最新收視再跌至15.4,幾乎係周末黃金時段最差嘅綜藝節目,難怪被人郁。

流行經典50年
流行經典50年

值得一題係,2大收視台柱《愛•回家之開心速遞》同《東張西望》一至五收視已經連跌3周,對比2月中2個節目平均唔見差唔多2點收視。而下次收視報告將會睇到《大步走》開播首周成績,估計唔多亮麗,令大台調早一個鐘避免對撼ViuTV嘅《最後一屆口罩小姐》。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

---------------------

2月22至28日 - 吳孟達逝世 重播《審死官》創3年收視紀錄

TVB最新公布2月22至28日收視資料,最矚目嘅唔係自家製節目表現,而係重播嘅電影《審死官》。

TVB收視 ︳吳孟達逝世 重播《審死官》創3年收視紀錄
TVB收視 ︳吳孟達逝世 重播《審死官》創3年收視紀錄

吳孟達喺2月27日星期六病逝,當晚TVB播放達哥、梅艷芳同周星馳合演嘅《審死官》,結果錄得18.4點收視,係翡翠台2018年以來周末電影時段收視之冠,比前一個星期播嘅《戰狼2》高出接近2點。而星期日追悼達哥節目《無可比擬的演藝泰斗 永遠懷念吳孟達》亦有21點收視,對比同時段前一周播出嘅《流行經典50年》足足上升5點。

《失憶24小時》劇透 ︳劇集淡季 居然有郭晉安視帝級演出
《失憶24小時》劇透 ︳劇集淡季 居然有郭晉安視帝級演出

至於兩線黃金時段劇集,第2周嘅《失憶24小時》微跌0.1點,收22.8點,不過不失。開播以來收視每況愈下嘅《陀槍師姐2021》,去到尾段終於有起色,錄得22.9點,比前周升一點。另一個收視越跌越有嘅係《天天開運王》,已經連跌3周,2月最後一星期收視只有16.7,似乎響起警號,但係仲有個幾禮拜節目未播……

其實嗰個星期一至五嘅黃金時段節目,竟然係得《陀槍師姐2021》收視上升,收視王牌《愛•回家之開心速遞》同《東張西望》都比前周跌1點,反而2個節目周末表現又比前周好。

下星期TVB將會公布《陀槍師姐2021》結局收視,到底會唔會保持升勢帶來驚喜?而《失憶24小時》又會有咩表現?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能