ViuTV出齊Anson Lo Edan 阿Jer加《大叔的愛》班底 新劇玩同居

上年一套《大叔的愛》成為ViuTV年度最高收視劇集，BL劇情加上MIRROR人氣成員呂爵安(Edan)及盧瀚霆（Anson Lo）主演，以收視計同大台劇仲有差距，但論聲勢同網絡人氣，確實無出其右。

ViuTV母公司電盈喺業績報告提到，會增加原創內容之際，有消息指Viu將會開拍新劇《百萬同居計劃》（暫名），以《大叔的愛》原班人馬再次上陣，MIRROR除咗派出Anson Lo同 Edan 之外，仲會加埋阿Jer(柳應廷）入劇組。

據知故事以簡慕華舉辦一個類似Netflix真人show《雙層公寓》的活動，以「百萬同居計劃」為名，安排一班唔同年紀背景嘅男女參加，一齊喺豪宅同居半年。參與演員會有《大叔》班底嘅Anson Lo、Edan、黃德斌、簡慕華、陳子豐、練美娟（娟姐）、徐㴓喬（Asha），並有Jer、《IT狗》嘅陳漢娜以及「講呢啲」嘅劉江加入。佢地大部份人會飾演同居活動參加者，而且各有關連。《大叔》劇中Asha暗戀Edan，但《百》會掉轉由Edan暗戀Asha。

娟姐早前喺IG出story自爆為新劇試造型，好有可能新劇就快開機。不過Anson Lo即將喺暑假拍西片《重慶大廈》打喪屍，而Edan嘅劇集《季前賽》早前先復工，似乎2位鏡仔有排冇覺好瞓。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！