東張西望︳何伯誓要攬炒大仔 爆大新抱知老公有外遇 街坊當面鬧何太「衰格」

何伯新何太話題停不了，日前新何太開直播，何伯大爆大仔私隱，又指二仔問佢拎錢，令網民一片嘩然。尋晚《東張西望》再有呢對「璧人」現身，原來新何太開直播嗰日，《東張》攝製隊全程跟拍何伯新何太由香港北上深圳一食店開直播過程，過關期間有人搵何氏夫婦合照，但亦有街坊喺鏡頭外對住何伯新何太大叫「衰格」！

日前直播期間，畫面外有把男聲提醒何伯「貓紙」遮住鏡頭，節目播出後真相大白，相信當時係《東張》幕後人員開聲。

其實呢次何氏上《東張》，唔少內容都同直播一樣，包括何伯講2個仔問佢拎咗幾多錢、大仔有兩頭住家、新何太自po當年16歲玉照以證明自己唔係傳聞中嘅骨妹「小燕」等。至於新料，何伯就回應網民指佢曾經因為爛賭而斬手指嘅講法，解釋當年做裝修遇意外而斷指。

嚟到戲肉，何伯繼續好好火氣再鬧仔女反骨，又指有仔女同佢講「而家攞咗錢，第日利息都冇，我食利息都夠食有突啦」，新何太就在旁插咀「邊有人咁虐待折磨自己老豆？」。何伯將矛頭指向大仔「佢折磨我，我唔怕爆佢，而家一查，佢份職（工作）都冇得做㗎喇！兩頭家呀嘛，犯法㗎嘛！」。

何伯講到興起，大爆大仔喺內地有另一頭家嘅事，喺何家唔係秘密，何伯話自己詐唔知，但已故何太、何氏弟妹都知情。何伯講呢段期間，新何太一如以往插咀話「佢地（何伯仔女）真係好殘忍架……」，想將話題帶返去何伯被仔女拎走筆錢件事，但係冇人理。新何太之後就爆，何伯大仔內地有第頭家，連老婆同個女都知，仲忍咗十幾年，不過費事出聲以免影響工作。

何伯透露大仔曾經警告佢「唔好再爆我嘢呀，我連份工都冇埋呀」，何伯一於無情講。「你都咁對我，都唔當我係老豆，咁咪爆你，等你份工……拉返你落嚟囉」。何伯亦明言搞大件事會影響仔女，但係佢認為「佢哋都唔顧我，我顧佢做咩呀？」，最後仲話「喺街見到千祈唔好話係我仔女，咪陀衰我！冇孝心嘅我唔生，點知你地咁嘅啫……法庭見呀！」。

新何太被指在旁挑撥離間，係令何伯同仔女關係冇彎轉嘅元兇。新何太就話網民「誤會晒囉」，仲話係何伯叫佢「七聲」（出聲）。「如果我都唔發聲，即係冇人理佢，冇人支持佢」。新何太重申「唔係我話要佢啲錢，係佢（何伯）需要攞返嚟佢手中，係佢覺得有錢揸手有安全感有個保障」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！