ViuTV開拍游泳劇 網民提議搵MIRROR／ERROR／Double S主演

ViuTV劇集《大叔的愛》掀起全港煲劇熱潮，上周（第6至10集）平均收視達6.9點，成為ViuTV開台以來最高收視劇集。喺噚日宣傳活動中，MIRROR成員兼主演嘅Edan（呂爵安）就話希望有機會拍續集或者電影版。雖然而家未有續集或電影版消息，不過ViuTV日前就公佈即將開拍以游泳作為題材嘅青春劇《i.SWIM》，並公開招募15-25歲識游水又想演戲嘅男女泳手演員。

消息一出，唔少網民都紛紛留言講出自己嘅心水男女演員名單。男主角方面，網民們紛紛提議MIRROR、ERROR成員、Mike導及前香港游泳代表隊成員朱鑑然，留言話：「要露肉嘅 好啱Alton AK Tiger Frankie Lokman Stanley」、「會唔會有193！ 佢游水勁呀 又靚仔 養眼」、「可唔可以俾個機會Stanley, AK, Tiger, Lokman同Frankie?」、「會唔會有朱鑑然？」、「開俾Mike導嗎？」及「Mike導可以幕前演出喎」等等。早前有傳媒亦有指男主角嘅人選其實已經鎖定MIRROR成員，部分成員更已經完成casting，不過喺《大叔的愛》之後，Edan同Anson Lo即時成為大熱人選。而Edan亦喺IG上載晒肌福利照，並留言寫上「但嚟緊工作需要必須操到好fit 希望變到大隻安」。唔知Edan係唔係真係有機會拍《i.SWIM》呢？

至於女主角方面，網民就提議搵「Double S」沈殷怡和陳欣妍、小薯茄女神阿冰及麗英，另外網民亦想鄧麗欣（Stephy）及唐寧可以客串一角，不過就唔好有「破冰轉身」。而「𡃁妹」李綺雯亦有喺帖文下留言：「昔日泳隊，可惜已超齡 各位後起之秀請踴躍報名。導演拍得好好架，同埋相信劇本都好好，因為導演真係識游水」，雖然佢已經超齡，不過一班網民就大讚佢視覺年齡ok同埋希望佢有份演出。

另外，唔少網民希望ViuTV可以開拍以籃球為題材嘅劇集，並搵MIRROR成員姜濤做主角，留言話：「姜b同袁導的籃球劇呢？」、「幾時開套籃球劇俾姜man」、「等緊姜濤同袁大導的籃球劇」及「好想你們拍姜b打籃球,襯現在還年輕,一定好熱血.等了很久了,希望你們考慮一下.」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！