雅虎香港新聞 ViuTV《Good Night Show 全民造星》邊位係網民心水靚仔？
近年選拔真人騷節目掀起熱潮，好似韓國嘅《Produce 101》更加係紅遍亞洲，而香港嘅ViuTV都唔輸蝕搞咗個全新選秀節目《Good Night Show 全民造星》。節目由99位男參賽者接受唔同嘅歌舞比試，最後選出一位終極偶像，呢位勝出者除咗可以獨得100萬獎金之外，佢仲有機會唱歌、拍劇同拍電影，晉身娛樂圈。節目搵嚟余安安、細So、Will Or、梁泰來及劉翁擔任評判，成功入圍50強嘅參賽者就會交俾劉美君、側田、Eric Kwok及卓韻芝等星級導師進行特訓。
節目未開始之前，ViuTV已經喺社交網站俾網民投選，最多心心嗰5位就可以直入50強，佢哋就係45號梁業（肥仔）、11號龍志權、74號何啟華（阿Dee）、91號盧瀚霆（Anson Lo）及34號楊樂文（Lokman）。節目唔經唔覺已經播咗9集，雖然唔少參賽者嘅造型都被網民取笑，仲話似「陳展鵬式衣着」，不過都睇得出佢哋好落力表演，勇氣可嘉。話得係「造星」，靚仔當然係一個好重要嘅條件啦，今日就同大家數下便為係網民心水靚仔啦！
No.99 姜濤
今年只得19歲嘅佢，曾經係快樂男聲港澳台區嘅代表，即係佢除咗擁有精緻嘅五官之外，仲好擅長唱歌喎！嚟緊好快就輪到佢表現，都是一定好多妹妹仔鍾意佢呀！
No.18 迪迪仔（鄧禮迪）
佢IG嘅相同電視上個樣好睇過官方宣傳照，今年29歲職業係model嘅佢，除咗聲稱擅長唱歌之外，原來平時好鍾意打籃球。
No. 11 龍志權
有留意開100毛嘅朋友，相信對龍志權一啲都唔陌生。今年26歲嘅佢，比起其他參賽者有知名度，要再晉級應該唔難！
No. 34 Lokman（楊樂文）
今年28歲嘅Lokman，職業係舞蹈員，唔知大家覺唔覺得佢熟口熟後你？其實佢就係《狂舞派》入面嗰個Dave呀，佢跳舞咁叻，就連狄易達同丁可欣都留言支持佢！
No. 43 里奧仔（黃鍵安）
23歲嘅里奧仔過往參加過校花校草選舉，有「嫩版吳尊」嘅稱號，當時已經令到唔少少女心心眼。其實佢除咗似吳尊之外，仲俾人話過佢似王力宏、關智斌同埋李敏鎬。
No. 71 Auston（馮柏堯）
同樣係model出身嘅Auston，今年23歲，就算節目未輪到佢表現，已經成功吸引一班網民讚佢靚仔、有型，兼勁俾心心。
除咗以上網民心水靚仔之外，大家仲覺得邊位參加者靚仔呢？
