【最佳母親節禮物】MIRROR演唱會今晚開騷 6場一票難求 媽媽級鏡粉最想收到：MIRROR演唱會飛

人氣男團MIRROR成軍兩周年演唱會《MIRROR ONE & ALL LIVE 2021》將喺今晚（6日）喺九龍灣國際展貿中心Star Hall展開一連6場嘅個唱，演唱會橫跨母親節正日（9日），有唔少媽媽級鏡粉都紛紛喺社交平台討論最想收到嘅母親節禮物原來係MIRROR演唱會飛！事關佢哋演唱會嘅飛實在係一票難求；一班鏡粉全力撲飛，開賣後秒速售罄，一度令售票網站癱瘓。

雖然MIRROR後來宣佈加開至6場，但仍有唔少鏡粉搶唔到飛，要到處搵其他方法撲飛。有「黃牛黨」就喺二手交易平台用超過原價兩倍價錢出售門票，亦有賣家自稱同娛樂圈人士相熟而騙取鏡粉買飛，牽涉金額逾10萬元。除咗鏡粉難撲飛，就連花姐接受訪問嗰陣都話連ViuTV員工要飛都好難，連自己老公都無飛：「我都只係得兩張唔需要錢嘅飛畀我兩個仔」，可見門票相當有限。

唔少鏡粉都表示好期待今晚開始嘅演唱會，MIRROR喺開騷前密鑼緊鼓排練，不過有成員就因為操練過度同壓力不約而同身體不適。先係姜濤喺生日當日（30/4）自爆曾因體力不支暈倒，呢兩日又輪到盧瀚霆（Anson Lo）同呂爵安（Edan），Anson Lo透露可能因為最近用聲太多，聲帶出現問題，為咗養聲，Anson Lo遵從醫生叮囑除咗工作以外減少講嘢，而佢亦喺Instagram發佈照片替自己加油打氣，寫上「show前一定要唱到」，仲叫鏡粉唔好太擔心。

至於Edan亦出現相同問題，佢喺Instagram表示「喉嚨寶寶要乖乖聽話喔，大家不用再送喉糖給我了，有很多了」、「希望身體生生性性，特別係聲帶寶寶」，雖然佢哋抱恙在身，但都唔敢怠慢練習，甚至排練到凌晨時份，希望用最好嘅表現多謝鏡粉支持。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！