港姐冠軍倪樂琳被網民批老相 與《愛‧回家》Rebecca沈可欣撞樣

倪樂琳（Ellyn）於《2024香港小姐競選》決賽以大熱姿態勇奪冠軍，23歲嘅佢於參選初期已備受關注，獲封為「翻版李嘉欣」，不過有網民對於佢似李嘉欣呢點有保留，狠批佢個樣比實際年齡更老，更指佢口大，比起亞軍梁嘉莹和季軍楊梓瑤僅勝在廣東話流利及口才較好。倪樂琳於港姐決賽當晚「佳麗回覆網上批評」環節中，亦對網民指佢「唔配城大李嘉欣」呢點回應，表示希望之後大家可以記得佢：「我覺得每個女仔都唔應該被定義，好多謝網民同媒體畀我呢個稱號令我參選時多啲曝光率，但我覺得女性應該係好多樣嘅，希望我今晚出色嘅表現令大家記住我，而唔係記住我係「翻版乜乜乜」或者「城大乜乜乜」，今晚之後可以記得城大出咗個香港小姐倪樂琳」。不過，有網民表示比起李嘉欣，認為倪樂琳與另一港姐盧淑儀及處境劇《愛‧回家之開心速遞》飾演「Rebecca」嘅沈可欣外貌更相似。

有網民亦於社交平台出PO表示見到好多人話建議倪樂琳加入《愛‧回家之開心速遞》：「啲人話建議港姐冠軍入愛回家做Rebecca個妹。雖然餅印咁，但做母女都唔得，要做姊妹。2024香港小姐冠軍倪樂琳23歲；愛•回家Rebecca沈可欣49歲」，有網民留言覺得沈可欣睇落靚過同後生過倪樂琳：「Rebecca 如果26歲生，做得佢阿媽....但係外觀，兩個年齡就差唔多」、「堅似樣」、「我都覺得沈小姐靚好多，仲要後生過佢好多」、「港姐的口太大」、「的確Rebecca比較靚」等等。不過，都有網民為倪樂琳平反，認為係當晚決賽化妝問題：「唔係佢fans，不過我覺得當晚個妝係化老咗佢， 睇返佢平時啲相個樣冇咁成熟～」、「佢輪廓其實幾好，五觀很出很上鏡，決賽應該用了突顯輪廓式化妝法，所以在佢來講反而over咗」、「至少唇膏隻色已經唔啱佢啦～」等等。

沈可欣日前與呂慧儀、張景淳、古佩玲等一眾《愛‧回家之開心速遞》演員到將軍澳電視城出席劇集中秋宣傳活動，回應與出爐港姐冠軍倪樂琳撞樣一事，表示收到好多朋友發送對比照片畀佢，笑指大家太抬舉自己，連老公楊證樺都話唔似，更指倪樂琳靚女又後生。沈可欣亦坦言25歲曾有一刻諗過選港姐，但當年正喺演藝讀最後一年，無理由放棄學位，加上喺台上穿泳衣過唔到自己嗰關，於是就無參選。至於倪樂琳亦於公開活動回應指，可以同《愛回家》演員撞樣證明自己都有做演員嘅潛質，覺得好開心。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！