大粒癦廖駿雄兒子廖家爵TVB台慶得獎 爆喊告知亡父「我知你會睇到」

近年TVB力捧唔少新人，尋晚嘅《萬千星輝賀台慶2024》入面，就頒發名為「全台力撐潛質男藝人」獎項作鼓勵。而已故綠葉、被稱為「大粒癦」嘅廖駿雄，佢嘅兒子廖家爵獲獎。

負責頒獎嘅譚俊彥提到，佢同廖家爵曾經合演劇集，廖飾演譚俊彥後生版，雙方有個承諾，就係是但一個拍戲嘅時候，對方都會喺現場陪住。譚俊彥又話，廖家爵要喺醫院場景，演爸爸生病彌留情況，「佢當日演得好好，因為佢行返出個廠度佢同我講，我爸爸真係病咗，佢真係就嚟唔得。佢好敬業咁完成咗每一個鏡頭。」

而廖家爵得獎後相當激動，喊住話「多謝俾呢個獎我，媽……喺呢度我攞第一個獎。老竇……你而家唔喺度，但我知你會睇到」，場面感人，令TVB總經理曾志偉等多名高層都眼濕濕。

廖駿雄喺80年代TVB經典劇《天師執位》中飾演「大粒癦」，其子廖家爵繼承衣鉢，2019年加入TVB。近年廖家爵演過唔少TVB劇集，包括《隱形戰隊》、《逆天奇案》、《使徒行者3》及《星空下的仁醫》等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！