雅虎香港新聞 電影LOL︳台灣視后賈靜雯壓陣 《瀑布》揭母女疫情下困獸鬥
疫情至今近2年，生活模式改變唔少，本來一家四口各自返工返學，好似聚少離多以同屋多過家人，點知變成work from home同learn from home之後，日對夜對磨擦仲多，先至發現以往同屋企人一日見三幾個鐘先係最佳份量。
喺台灣上畫冇耐嘅台片《瀑布》，就係以疫情期間嘅隔離生活做背景。一個家庭，只有白領媽媽品文同17歲讀高中三年級嘅女小淨，本來母女關係都唔算和睦。後來新冠疫情爆發，小淨有同學中招要居家隔離，品文因此都要留喺屋企，兩母女嘅困獸鬥正式開始。
《瀑布》導演鍾孟宏前作有《陽光普照》同《一路順風》等，鍾導受訪時提到，拍完為佢帶來金馬獎最佳導演嘅《陽》之後，太太問佢下部戲可唔可以由女性做主角、無人斷手斷腳無人死，只有食飯講嘢嘅情節，導演聽完嘅反應係「做咩要我拍呢啲？」。但係最終鍾孟宏真係拍出一套符合呢幾個條件而不失個人風格嘅作品。
鍾孟宏寫劇本時已經屬意由台灣金鐘獎視后賈靜雯飾演品文，小淨就由新生代女演員王淨擔演。鍾導坦言係睇外表選角，因為賈靜雯同王淨好符合中產家庭呢個故事背景。
有睇過台劇《我們與惡的距離》都見識過賈靜雯嘅演技，今次《瀑布》對賈更加有挑戰性，因為導演用好多近鏡交代，演員嘅細微情緒變化睇得一清二楚，如果睇返現場花絮，鏡頭同攝影機「隊」到面前都仲要投入角色之中繼續演，少啲功架都唔掂。賈靜雯拍呢套戲時有好多場面都要素顏上陣，為咗培養情緒直情擺低2個女搬去酒店住1個月，難怪訪問時都話「呢套應該係告別作！」。
《瀑布》將會成為奧斯卡最佳國際電影嘅台灣代表，而且獲得11項金馬獎提名。寫稿時唔小心睇到劇透……原來個故事都幾峰迴路轉，唔止係兩母女拉扯糾纏咁簡單，值得期待。
更多電影文章
電影LOL︳神奇女俠Gal Gadot演《白雪公主》魔后 網友大呼選角錯晒！
電影LOL︳新一代邦女郎安娜迪艾瑪絲變影壇搶手貨 傳接拍殺神John Wick外傳
電影LOL︳迪士尼拍《波西傑克森》美劇 原作者親自執筆費事電影版又爛尾
電影LOL︳九把刀再執導 《月老》搵柯震東主演 再現《那些年》奇蹟？
電影LOL︳DC開拍《蝙蝠女》電影 最搶眼卡士係呢位暴肥前男神
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
