《培生擂台: 無敵盃》賽前過磅記招趣味十足 劉馬車一度突襲龍心兼扻頭埋牆

「百億富三代」兼有「香港電競之父」之稱嘅鍾培生（Derek），近年搞嘅拳賽都成為城中熱話。早前佢邀請周永恆、前微辣成員霍哥、龍心及劉馬車等拳手於《培生擂台：無敵盃》We Are Champs 2023展開對決，而今日就舉行賽前過磅記招。

拳賽喺聽日（1日）先舉行，不過估唔到喺賽前過磅記招已經趣味十足。首先龍心要求大會稱呼佢為「第六宇宙 - 東方餓狼.剋龍」，不過女主持竟然兩度叫錯，搞到佢非常不滿。龍心及劉馬車都成功過磅，不過期間女主持問龍心係唔係出兩萬蚊收買劉馬車打假拳，佢就有啲九唔搭八咁話：「睇吓第七宇宙嘅市民，覺得呢件事真定假，考下你哋嘅聰明才智。」之後，龍心再話有一日佢撞到劉馬車，而劉馬車就同佢講鍾培生好度縮，不如佢哋唔好認真打，龍心就話佢冇體育精神，仲話如果劉馬車KO佢嘅話，佢再俾多2萬，前後加埋4萬，戰勝有錢人鍾培生！

而劉馬車就話龍心係垃圾，將整件事顛倒：「明明係佢話俾兩萬我，想收買我，叫我打假拳打輸俾佢！我唔知叫你叫乜，我叫你『食屎狗』算啦～」 劉馬車表示自己係貪，不過唔係貪龍心嗰兩萬蚊，佢係貪拳賽嘅總冠軍。

去到佢哋合照嘅時候，劉馬車終於都忍唔住，突然突襲對方，期間仲起埋飛腳，不過龍心就非常地冷靜；劉馬車就被保鏢制服，不過劉馬車竟然扻頭埋牆。

輪到周永恆及霍哥過磅，周永恆除咗不停叫囂之外，佢仲不停挑釁霍哥，更讀出關於早前微辣及阿晶事件嘅網民留言，搞到場面一度混亂，連前微辣成員BlackJoe都試圖衝上前打周永恆。

喺賽前過磅記招結束後，劉馬車喺離開大廈時，因涉嫌「非禮」被警方帶走，及後鍾培生喺IG表示佢哋打咗去警局搵劉馬車，不過佢已經離開咗，所以聽日7點半嘅拳賽可以繼續。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！