雅虎香港新聞 《風林火山》預告片剪接師確認影片已完成 導演版本片長達6小時︳電影LOL
今年上半年港片憑《九龍城寨之圍城》取得破億嘅優異成績，下半年港產片最令人期待嘅作品可能係麥浚龍Juno執導嘅億元鉅製《風林火山》。但係電影2017年開工之後，上映日期遙遙無期。早前有傳媒訪問《九龍城寨之圍城》出品人陳羅超，陳生透露佢知道《風林火山》將會排喺年底上映！不過消息傳出後，《風林火山》嘅宣傳未見起動，令觀眾始終唔肯定年尾睇唔睇到呢套傑作。
負責為《風林火山》預告操刀嘅剪接師黃海，星期日出席香港電影資料館舉行嘅《網絡時代的預告片魔法》座談會。有報導指，黃海喺座談會表示《風林火山》影片目前已經完成，可以上畫。而黃海亦收到導演麥浚龍交俾佢，三個分別片長2小時、3小時及6小時嘅版本。不過黃海表明，6小時版本將唔會送交當局過審，所以觀眾應該無緣觀賞。咁到底最長同最短2個版本之間，多出嚟嘅4個鐘頭片長係有啲咩呢？黃海則話短版直接刪去個別人物角色，以及同佢地相關嘅戲份。
《風林火山》雲集金城武、梁家輝、任賢齊、古天樂同劉青雲嘅「五條煙」陣容，加上以廠景模擬銅鑼灣街頭落雪效果，自然備受期待。電影2017年中開工，拍至2018年3月完成拍攝工作，但後期等因素影響下一直未見上映期。7年時間，莫講話演員個樣，連個世界都出現大量轉變。男主角之一金城武拍完《風》就神隱多時，而負責配樂嘅坂本龍一去年3月亦因病逝世。《風林火山》嘅成本亦係電影話題之一，有傳開支高達港幣1億5千萬元，但因為後期製作加上導演追求完美，成本以倍數上升。
更多電影文章
我談的那場戀愛／愛情城事／有詭難言／機動警察 劇場版 東京毀滅戰／花腐／風之城︳電影LOL
《小朋友齊打交》LF2港產遊戲拍大電影 古天樂天下一同試當真合製？︳電影LOL
Cola War 八十年代可樂大戰將拍成電影史匹堡做監製 收錄兩大品牌惡鬥故事︳電影LOL
《哈利波特》劇集版選角展開 瘋傳妙麗由黑人演員飾演 原來係流料？︳電影LOL
威尼斯影展妮歌潔曼封影后 奔喪未能上台 艾慕杜華首套英語片奪金獅獎︳電影LOL
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
