「好青年荼毒室」鹽叔再被爆瞞婚出軌 女粉絲爆鹽叔大話連篇兼為佢墮過胎

YouTube頻道「好青年荼毒室」成員鹽叔（楊俊賢）早前被爆出瞞婚偷食女粉絲，而除咗鹽叔宣佈暫停所有目前活動之外，荼毒室亦發聲明表示其他成員無法接受鹽叔嘅行為。原本以為事件已經告一段落，點知噚晚（29日）又有人喺網絡爆出新料，受害人指同鹽叔喺埋一齊期間，鹽叔不停講大話、及曾為鹽叔墮過胎添呀！

喺噚晚，有網民喺討論區以「【突發】荼毒室渣男鹽叔原來仲搞大埋人個肚」為題出PO，並上載多張疑似受害人爆料嘅截圖，當中講到佢同鹽叔喺上年5月開始發展成情侶關係，不過喺二人拍拖期間鹽叔不停講大話， 首先上年12月見到鹽叔戴戒指嘅相片，而佢當時就解釋已經離婚，所以女粉絲選擇相信並冇再繼續追問。

去到今年1月，女粉絲問佢成日嘅行程，鹽叔就話要去慶功，不過之後就被踢爆冇留低慶功，而係返屋企陪家人。鹽叔及後就解釋話同前妻一直向鹽叔父母隱瞞離婚消息，平日都係裝作無事，鹽叔仲話有離婚證明。點知去到2月嘅時候，女粉絲逼問佢，佢先承認根本冇離婚，仲要有一個大約一歲半嘅小朋友。女粉絲仲話鹽叔曾經話過考慮離婚同佢一齊，不過未諗到點實行。之後，女粉絲再懷疑小朋友嘅真實年紀，估計鹽叔喺太太懷孕期間已出軌，因為討論區有網民指喺上年年中見過鹽叔同佢懷孕中嘅太太，所以小朋友無可能係一歲半。

女粉絲再爆出自己曾經為鹽叔墮過胎，而鹽叔當時仲以家人失蹤為由，冇去陪同女粉絲做手術：「佢承諾會陪我處理，但當日我終止懷孕時巧合地佢聲稱屋企人失蹤之後搵返入咗醫院，所以冇辦法陪我，要我自己一個面對，但佢有照常去荼毒室開live ，照常出席活動，我休養期間冇見過我連一句慰問都冇。」之後，鹽叔仲將墮胎一事形容做「大病一場」去隱瞞其他荼毒室成員，所以其他荼毒室成員都算係受害人，因為佢哋對鹽叔偷食並不了解。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！