「細細粒」陳嘉佳內地搵真銀賺到盆滿缽滿 擁逾十萬呎紐西蘭別墅兼孭名牌手袋

現年38歲嘅「細細粒」陳嘉佳憑TVB劇集《老表，你好嘢！》及《老表，你好Hea！》為人熟悉，近年長駐內地發展搵真銀，主力喺抖音直播擔任「吃播」推薦美食及拍片同網民分享，仲曾經試過賣牛扒一場大賣500萬，成功闖出名堂；早前佢更榮升做海味店老闆娘，行頭升呢去到富婆級別。

吸金力驚人嘅細細粒，平時除咗分享美食影片，更曾拍片介紹紐西蘭基督城獨棟花園別墅屋企，片中所見別墅逾10萬平方呎，採用複式設計，具有兩個客廳、桌球台、客房、開放式廚房，主人房、三間客房及室外大花園，細細粒更加於片中表示；「我就是富婆啊，Vivian全世界其中一個家給你介紹好了」，可見近呢幾年賺到盆滿缽滿。

細細粒唔止有別墅揸手，佢嘅行頭仲越嚟越犀利，好似早前佢去日本旅行就已經拎住一個價值8萬蚊嘅HERMÈS Birkin手袋；早前佢仲試過以全黑打扮拎住CHANEL手袋坐喺街頭小食檔食嘢。喺佢嘅IG所上載嘅圖片中，細細粒仲擁有唔少名牌嘅首飾及太陽眼鏡添呀！

早前有傳細細粒喺上海擁有3幢物業之外，佢最近仲拍片公開杭州嘅屋企內部裝修，財力絕對唔可以睇小，絕對係娛樂圈中嘅富婆之一呀！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！