【洗米華去咗邊？】洗米嫂38歲生日同囡囡慶祝 拉姑踏入67歲有老公陪

生日快樂！

今日係陳慧玲（洗米嫂）38歲生日，洗米嫂在Ig晒捧蛋糕嘅慶生相，着喱士衫嘅洗米嫂笑容燦爛，網民紛紛留言祝佢身體健康，幸福美滿。

睇番呢幾日洗米嫂嘅Ig，4日前貼咗3歲細女周善潼嘅嘟嘴賣萌相，仲有神戶牛、過山車嘅相片，相信洗米嫂帶咗囡囡去日本慶祝，唔知老公太陽娛樂揸弗人周焯華（洗米華）有冇同行呢？呢啲相會唔會係洗米華操刀拍攝呢？左右逢源嘅洗米華既有正印Heidi，亦有為佢生咗兩女一子嘅情人Mandy Lieu，每逢過年過節都要分身慶祝，話晒今日係老婆牛一，斷估洗米華會陪老婆度過。

除咗洗米嫂生日之外，網上亦有謝霆鋒媽咪狄波拉嘅生日相，上月尾踏入67歲嘅拉姑，日前在老公江耀城陪同下跟好友包括陳淑芬慶祝，今日陳淑芬在Ig貼合照祝賀，拉姑打扮得明艷照人，頭巾同上衣襯埋一套，好友們送上特別訂造嘅拉姑肖像嘅蛋糕，生日牌寫着「靚拉姑」，拉姑感動到流出眼淚，場面溫馨。