【賀結婚12周年】人妻Kay着惹火低胸吊帶裙 與張繼聰撐枱腳

不經不覺結伴走過12年，謝安琪(Kay)同張繼聰(Louis)一直恩愛如昔，Kay絕對係幸福人妻嘅榜樣，張繼聰凌晨喺Ig貼出同Kay頭貼頭嘅合照，食西餐撐枱腳，慶祝結婚12周年，相中見Kay罕有性感，身穿黑色吊帶連身裙，非常惹火，阿聰喺留言中引用美國作家Mignon McLaughlin對婚姻嘅睇法，指一段成功嘅婚姻係需要與同一個人多次墜入愛河，相信Kay睇到應該好冧！

而阿聰仲訂咗一對水杯，見杯嘅木柄上刻有「Kay」同「Louis」嘅字，紀念Chain Wedding，嚮往平凡簡單嘅幸福，寫道：「快樂不知時日過…」

Kay同阿聰於2007年奉子成婚，阿聰曾喺叱吒頒獎禮台上，承諾會好好照顧Kay同囝囝張瞻，就算時光倒流幾多次，佢都會娶Kay做老婆，公開對Kay講「我愛你」，阿聰係講得出做得到嘅人，當年Kay唱《囍帖街》唱到街知巷聞，同係歌手出身嘅阿聰，被網民稱「廢柴老公」，後嚟阿聰踩入公仔箱同大銀幕一直努力演出，成功扭轉「女尊男卑」，Kay於2016年宣佈停工造人，想生第二胎，阿聰全力支持老婆決定，獨力孭起成頭家嘅開支，到囡囡張靖出世，阿聰仍然好錫Kay，兩人有影皆雙。