【Captain Nancy呢？】宇宙G.E.M.殺入Marvel 變超級英雄JEWEL

舊年年底，宇宙G.E.M.（鄧紫棋）曾經喺社交網站貼過一張佢同Marvel之父Stan Lee合照，當時已經有人懷疑佢哋會有合作嘅機會，點知，原來係真o架！阿宇宙G.E.M.今日已經成為Marvel當中其中一個超級英雄喇！

今日，Stan Lee喺上海舉行「斯坦·李動漫宇宙展」，年屆95歲嘅Stan Lee就冇出席，不過宇宙G.E.M.就係呢個展覽特別嘉賓。而除咗做嘉賓之外，佢仲貼出一張攞住漫畫嘅相，表示自己做埋Marvel入面其中一個超級英雄。「從未想過有一天我會有機會變成超級英雄！超級無敵興奮！大家覺得我的超能力會是什麼呢？」

嗱，宇宙G.E.M.嘅超級英雄角色個名叫JEWEL，而雖然JEWEL嘅造形係以佢為設計藍本，但睇番手上幅漫畫，入面個角色金髮之餘仲要戴住口罩咁，唔講又真係估唔到佢就係鼎鼎大名嘅宇宙G.E.M.，而一眾Marvel迷睇完之後，亦都話唔似，又好搞笑咁話JEWEL手上攞住嗰兩枝係螢光捧，仲有人問：「問過Captain Nancy未」。

係喎，Captain Nancy起碼都有十字步同額頭粒墨救地球，咁唔知宇宙G.E.M.呢個JEWEL，又會有乜絕招呢？