一舞傾城|陳法蓉演媽媽生不乏親熱戲大解放 莊鍶敏懷疑過咗電視尺度
由王晶監製嘅TVB劇集《一舞傾城》去年拍攝時已表明參考台劇《華燈初上》製作,年底釋出預告片更被指畫面尺度大,內有不少強姦、群毆、SM虐打、掌摑等情節。《一舞傾城》演員包括陳法蓉、莊鍶敏、姚子羚、蔡潔、鄺潔楹與陳星妤等等,定於5月15日開播。日前,陳法蓉與莊鍶敏為《獎門人I Love媽媽感謝祭》錄影時大爆劇情相當重口味,又指不乏性感造型及親熱戲;莊鍶敏更表示拍嘅時候懷疑過咗電視尺度。
《一舞傾城》喺佛山及廣州取景拍攝,以八、九十年代尖東舞廳做背景,講述5個唔同年齡和階層嘅女生於夜店相遇並成為好姊妹,描述一班舞小姐於夜店嘅人生及愛情經歷,例如Monica(蔡潔飾)為男友籌錢打官司而下海,卻遭對方背叛、KK(陳星妤飾)為照顧年老體弱嘅媽媽及弟妹,放棄升讀大學而下海賺錢;5人經歷連串愛情起跌後仍互相愛護和照顧。56歲陳法蓉相隔7年重返娘家拍劇,是次於劇中飾演媽媽生「沙律姐」,為眾姊妹嘅心理輔導員,幫助佢哋嘅愛情疑難。常以旗袍、低胸、貼身造型示人嘅陳法蓉身邊不乏裙下之臣,但佢一直守候著被冤枉入獄嘅老公唐文龍;唐文龍出獄之後,陳法蓉就大解放。不過,二人嘅親熱程度就不及劇中死對頭莊鍶敏。
莊鍶敏為此劇染成金髮,同樣飾演媽媽生,常以高衩旗袍示人。莊鍶敏透露劇中與武術高手李嘉會有唔少床戲,仲奪走對方第一次床戲,但平時做開強姦戲嘅李嘉原來係個怕醜仔,床戲亦由莊鍶敏做主動。莊鍶敏又表示,拍攝呢套劇時懷疑係過咗電視尺度,因為都拍咗幾個版本,唔知最後會剪接成點,其中有一個係大膽少少嘅電影版本。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!