【中古車】襟玩慳油混能車

混能車（Hybrid）而家已經遍地開花，由初時日本車帶頭，到而家歐洲車都追上嚟，開始出啲Hybrid車款，例如寶馬ActiveHybrid、奧迪etron甚至保時捷都有E-Hybrid，而且係插電式（Plug-in）設計，除咗行車嗰陣充電之外，架車唔郁都可以插電掣充電，而且純電能行走距離仲一啲都唔短，所以非常慳油。

第二代Prius二手價好平，不過電池狀況係最大考慮因素。

當年Prius都仲係好簡約，車廂設計唔靚。

不過一講起Hybrid車，心裡面總會響起一個名字：Prius，呢架車可以講話係Hybrid車嘅鼻祖，佢嘅成功令混能成為普及科技，而且唔單止日本，喺歐洲同北美都大行其道（仲曾經搞到豐田一鑊泡添……）。呢架環保車由1997年推出第一代到今年嘅第四代，已經喺全球賣咗幾百萬架，而且唔局限於原有Prius車系，仲衍生出Prius C、Prius V同其他豐田混能車如Auris、Camry、Estima同Alphard嘅Hybrid版，而凌志IS、ES、GS、NX、RX都有混能型號，全部都係用豐田精心研究嘅混能系統。

1,500c.c.引擎配摩打嘅油電混合系統，馬力只有110匹。

動力流向顯示圖，而家睇番覺得太簡單。

好多人買Prius都會揀全新車，覺得二手車會好多嘢整，特別係混能系統嘅電池，因為唔知上手點用，亦check唔到嚿電用剩幾多%，驚架車一買返嚟死咗嚿電，咁就盛惠兩、三萬蚊返廠換。講起換電池，坊間係有非原廠車房可以代換，不過嘅然你都唔信上手車主，咁何必仲要信非原廠車房呢？如果真係決定換電，我會建議你唔好慳，返廠換完起碼有保養，有起事上嚟都可以追；而且混能系統唔係求其一間車房車識搞，返代理用原廠工具同電腦始終安心啲。

第三代Prius外型前衛啲，水貨有包圍版係型啲但太重影響慳油表現。

「喂，駛唔駛係咁幫廠賣廣告先？」既然你咁諗，咁我都唔爭在講埋喇：豐田車係出名襟嘅，Hybrid車款都唔例外，我身邊就有人買咗架二手嘅第二代Prius，即仲係1,500c.c.引擎配摩打嗰隻，2008年尾期行貨，而家已經揸到成十幾萬公里，嚿電完全無事，仲keep住行緊七毫子一公里，一切正常。當然，買二手車真係撞手神，佢嘅好彩唔代表所有二手Prius買家都咁好彩，如果有保留嘅，買新啲年份嘅車款就會比較安全。

五門揭背設計，車尾箱空間好夠用。

如果講2008年嗰代Prius，屬於車系嘅第二代型號（XW20），覆蓋年期都幾闊，由2003到2008，車型由第一代嘅四門三廂房車，變成類似五門揭背嘅型態，最大得益係個尾箱好大，可以擺好多嘢。買呢代Prius嘅好處，係佢嘅引擎只有1,500c.c.，一年牌費四千蚊有找，而且車價好平，由三、四萬到七、八萬不等，要買嘅話可以學我老友咁搵架尾期行貨。不過，唔好旨意呢架車好好揸，始終得 110匹、用CVT波箱同配窄身15吋「香雞呔」，買嚟代步，足夠嘅，而且好慳油；至於駕駛樂趣……可以講話冇。

新一代混能系統，已經改用1,800c.c.引擎，扭力表現好好多。

雖然縮細咗，不過呢個動力流向圖就靚仔易睇過上代。

之後一代由2009年到2014年，屬於第三代（XW30），引擎已經轉咗1,800c.c.，一年牌費要俾差唔多5,800蚊，不過就明顯比上代好力，總馬力134匹，而且加埋摩打全開，都俾到你一定嘅加速感同扭力表現，所以有時喺街都會見到呢啲第三代Prius行得幾快下。但係同上一代一樣，呢代Prius嘅駕駛感仍然好虛，堂軚彷彿冇晒路感，仍然係輕飄飄。二手價個range都拉得幾闊，由最前期（2009年）嘅十萬蚊樓下，到轉款前嘅尾期（2014）嘅二十幾萬不等。咁好老實講，當2016年第四代全新車都係賣緊三十萬有找，就真係無謂投資廿幾萬買架舊款，用十三、四萬買架facelift版（2011年後）我覺得都OK。另外，上代亦有啲G’s Deluxe版、Modellista包圍版嘅水貨，配大大個跑車鈴，提番你，架車得百零匹，如果揹咁重磅棧嘥油，咁就同Prius慳油嘅原意背道而馳喇。