中國網民怒斥內地食品商「瞇瞇眼」廣告照「辱華」 涉事女模發聲：眼睛小不配做中國人？

早前中國網絡零食品牌「三隻松鼠」2019年一則廣告被翻出並引起熱議，網民直指廣告嘅模特兒「眯眯眼」形象有刻意醜化中國人之嫌；不過，涉事廣告模特兒菜孃孃就發文表示，唔明自己點解會與辱華扯上關係，並指每個人審美唔同：「我眼睛小就不配做中國人了？」

對於網民評撃，三隻松鼠發文道歉，並表示模特兒係中國人，妝容係基於個人特徵打造，從無刻意醜化，同時替頁面更新，表示會檢查其他產品頁面，杜絕類似情况。而廣告模特兒菜孃孃就喺微博發長文回應網民指控，指自己天生就係咁嘅樣，強調無刻意營造辱華形象：「我眼睛就是這樣，甚至生活中比這還細小。那是不是說長這樣了就不該選擇模特這個職業？長這樣了出生那天就在辱華了？那是不是也可以告你歧視了？」

菜孃孃又指，自己只係一名普通模特兒，又唔係公眾人物，對於網上評論感無奈，唔知自己做錯咗啲咩要遭受呢種網路暴力，更表示每個人審美觀唔同，各有喜好，不過認為每個人都有屬於自己嘅魅力，唔會因為呢件事而改變自己性格、樂觀態度同外貌去迎合市場需要：「也許有些朋友欣賞不了我這種類型，但是也大可不必這樣來攻擊我，蘿蔔白菜各有所愛」。最後，菜孃孃希望網民唔好再私訊人身攻擊，否則將採取法律行動：「愛國我舉雙手贊成！但事事都要上綱上線，那這就是一種病態了！大家做一個心態健康的網民吧。」

文章發出後，有部份網民力撐菜孃孃，指佢長相好有味道，又具辨識度，而官媒《人民日報》亦發表對呢次「辱華事件」睇法，指愛國係本能，但要分場合與情景：「只要使用小眼睛模特兒一律就是辱華，這多少也有些太過敏感了。」又指，每個人長相各有特點，無需定於一尊，社會審美先可以更健康更健全。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！