中年好聲音羅啟豪個唱VIP飛天價$2800被批 結果88秒賣完

《中年好聲音2》正在熱播，而第一季嘅季軍羅啟豪（Ramon），以黑馬之姿由素人成為歌手，人稱「英國豪」嘅羅啟豪原來有唔少fans，人氣甚至拍得住同屆冠軍周吉佩、一早就有大批歌迷嘅龍婷等人。

早前羅啟豪宣布於12月23日於旺角麥花臣場館，舉行首個售票個人演唱會《與羅啟豪之冬日約會 Winter Rendezvous with Ramon》，門票分為$580、$880及＄2800VIP套票。買VIP飛嘅觀眾可以有前排座位、親筆簽名VIP通行證、價值750元的聖誕禮盒、與羅啟豪於後台單獨合照及開show日下午參觀綵排等。Ramon雖然未有個人作品，但演唱會票價拍得住唔少歌手，有網民直言「哪來的自信」。而今年初韓國女團BLACKPINK來港開show時，VIP票價都係比羅啟豪貴2百蚊左右嘅$2999。

不過百貨中百客，羅啟豪早前宣布個唱40個VIP套票名額，開售後88秒就賣晒，可以話係KO網民意見。Ramon都出post表示「連平時自己睇演唱會都唔捨得用咁多錢出嚟買飛，無諗過有人會為自己毫不考慮攞咁多錢出嚟去聽自己唱」，佢話會全力以赴，唔好令嚟支持自己嘅朋友失望。