中年好聲音2三甲起底 古淖文儼如肥媽契仔 譚輝智原來係富二代馬主 顏米羔曾執導三級片

《中年好聲音2》決賽周日晚完成，7強人馬古淖文、安雅希、譚輝智、顏米羔、黃劍文、沈宗賢及陳俞霏一輪角逐後，由古淖文以大熱姿態奪冠，自稱從未參加過歌唱片賽嘅譚輝智得到亞軍，並獲得「觀眾最愛好聲音大獎」；而另一黑馬顏米羔就得第三。

來自澳門嘅古淖文剛好「夠秤」參加《中年好聲音2》(36歲），而佢喺2009年以原名古卓文參加亞視《亞洲星光大道》，同陳蕾、羅力威、譚杏藍等人同屆參賽，古淖文最後打入決賽，以第5名「畢業」並得到台風獎。當年《亞洲星光大道》搵張佳添、周國豐、肥媽等人做評判，同《中年好聲音2》陣容差唔多，同樣來自澳門嘅肥媽因而結識古淖文。後來古淖文成為藝人及葡語活動司儀，肥媽不時會帶埋古淖文一齊登台，二人情同母子。古淖文入行多年但發展平平，曾於訪問透露之前想加入TVB﹐仲託肥媽搭路但遭對方拒絕，建議佢成熟啲先再打算。而古淖文同《亞洲星光大道》嘅參加者關係唔錯，早前陳蕾紅館開個唱，古淖文同「星光一班」同學都有去撐場。

38歲嘅譚輝智報稱係廣告設計師，首集出場就以5盞燈晉級，但當時佢話自己未參加過歌唱比賽，而參賽原因係想俾2個小朋友知道「爸爸都有突破自己」。甚受觀眾喜愛嘅譚輝智原來家底十分豐厚，早前有傳媒報導指譚輝智同爸爸及兄弟係馬主，名下共同擁有愛駒「可愛新星」。譚父譚握籌從事地產建築行業，曾出任仁愛堂總理，曾為慈善演唱會演出，試過同汪明荃合唱。根據資料，譚握籌多年前以買賣村屋起家，後來更成為地產發展商，曾參與元朗多個住宅項目。2015年有報導指，譚握籌嘅公司與生意伙伴以5300萬購入元朗洪水橋地皮。

參賽以來表現備受欣賞嘅顏米羔身兼保險理財顧問同電影導演2個身份。顏米羔曾經執導2017年上映嘅三級片《私人會所》，以金融業內幕揭秘為主線，不乏大膽場面。顏米羔2001年入讀演藝學院電影電視系，就讀期間同同學開公司幫人拍婚禮，後來退學轉任攝影師，更成為郭富城演唱會指定硬照攝影師。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！