中年好聲音2︳向氏猛人入圍100強 向展鵬係年薪過千萬保險高層 後生時做過model

TVB《中年好聲音2》日前公布100強入圍名單，除咗一班有名有姓嘅藝人同明星家屬之外，仲有唔少猛人。梁思浩尋日喺社交平台發文，祝賀多年好友向展鵬（Jeffrey）成功入圍，仲大爆對方係年薪過千萬嘅高層。原來梁思浩同向展鵬三十幾年前已經認識。

向展鵬係向氏家族後人，爸爸向華榮係電影界猛人向華勝、向華強嘅四弟。向展鵬年少時曾被相中做模特兒，為雜誌影過時裝照，當年更同英皇高層及經理人霍汶希（Mani）合作過。梁思浩嘅帖文提到，向展鵬當年曾被現為郭富城經理人嘅小美簽下。

後來向展鵬冇喺娛圈發展，喺1996年轉投保險界，入行不久已經成為業界新人王，而家佢出任保險公司資深總監，團隊約有400名成員。有指林作之前都曾經係向展鵬嘅下屬。向展鵬喺家族成員中算係低調嘅一位，但由佢IG可見，佢同唔少圈中人都有交情。向展鵬曾經透露，因為家族身份而被「另眼相看」，但佢自言家境對工作冇幫助，因為家人都唔信保險，歷年嚟為家人開嘅單寥寥無幾。

有人歡喜有人愁，雖然有唔少藝人入圍《中年好聲音2》，但係52歲嘅顏仟汶就未能成功。佢喺FACEBOOK出POST寫道「對不起我無用，讓支持我的失望了，爸爸對不起，我心情真的很難過」。顏仟汶受情緒病纏擾多年，唔少身邊圈中好友見到佢出post放負，都紛紛留言打氣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！