中年好聲音2｜顏米羔繼捲賄選疑雲 再被爆疑有人收錢假扮其粉絲

TVB歌唱選秀節目《中年好聲音2》決賽將於周日（24日）舉行，7強選手古淖文、安雅希、譚輝智、顏米羔、黃劍文、沈宗賢及陳俞霏將角逐冠、亞及季軍獎項。而由觀眾網上投選嘅「觀眾最愛好聲音大獎」近日已經正式開始，不過大熱之一嘅顏米羔就捲入賄選疑雲，及有網民喺threads聲稱自己收咗錢去假扮顏米羔嘅粉絲。

雖然顏米羔係今屆大熱人選之一，不過喺最新嘅排行榜就未能晉身三甲位置，令唔少粉絲及親友擔憂不已。最近有報道指有人自稱係顏米羔嘅「好兄弟」，呼籲大家喺網上投票支持顏米羔，可以憑截圖作證明，去換取一次價值280元嘅「撥筋肩頸按摩」，隨即引起網民討論及惹賄選疑雲。

之後顏米羔喺社交網站發聲明澄清：「聲明：有關有報道指有米羔支持者推出投票送療程之貼文，非米羔及後援會的意思，本人亦通知了發問者移除貼文，多謝大家支持。」除咗疑似發文者喺該PO下留言解釋及道歉之外，顏米羔亦有透過《TVB娛樂新聞台》澄清，佢喺訪問中解釋事件，佢表示自己知道事件後，已經即刻同發文者溝通，佢仲話明白對方太愛自己，唔忍心佢唔為自己拉票，所以佢都經一事長一智，要主動為自己拉票。

另外，有網民喺Threads出PO表示自己收咗錢去假扮顏米羔嘅粉絲，佢上載一張顏米羔喺星期一（18日）出席《中年好聲音2》7強嘅記者會片段，並寫話：「第一次做假Fans 爽Lam 細個以為啲Fans係真 Btw 呢個人一定覺得自己好有型。」 之後，有網民對假扮粉絲感到好奇，留言問有幾多錢人工，之後出PO者就會答話：「一日$200一個鐘」，不過要有人帶先可以做到；同時佢仲話自己嗰份糧係唔包嗌，有另外一組負責嗌。不過因為越嚟越多人關注，所以呢個PO已經刪除。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！