他來自江湖｜「老姑婆」陳嘉賢息影後照顧患癌囡做傳道人

前無綫藝人陳嘉賢以劇集《他來自江湖》「老姑婆」黃玉華一角而令人熟悉；陳嘉賢1982年參加第11期無綫藝員訓練班出道，同屆同學包括梁朝偉、周星馳、歐陽震華、吳鎮宇、張兆輝、關禮傑等等，當年陳嘉賢一畢業就接到演出有對白嘅角色，星途發展順利，不過1993年毅然退出娛樂圈。日前，陳嘉賢就以傳道人身份接受網上訪問，分享息影後嘅經歷。

已息影近29年嘅陳嘉賢，曾於《今生無悔》、《神勇CID》、《妙探出更》等多套劇集中擔任二、三線配角。訪問中，談及1989年《他來自江湖》「老姑婆」一角，陳嘉賢笑指當年係刻意扮老：「當時我未夠老，係刻意扮老，因為我要飾演老姑婆，咁我就留意喬媽（喬宏太太小金子），跟佢戴副眼鏡，感覺老好多！演員好多時要自己諗橋，令角色生動。」陳嘉賢又憶起一班藝訓班同學，表示當年覺得周星馳和梁朝偉好似好唔定性、好鍾意玩：「周星馳單眼皮嘛，一貼咗雙面膠紙就叫人睇佢對眼，成日問人佢有冇靚仔到，真係好搞笑。後來睇佢作品先覺得佢好有才華。」

陳嘉賢提及當年離開娛樂圈原因，覺得藝人平時要等通告，就連朋友婚禮做姊妹都要臨時甩底，直言當年貌美如花、身壯力健，但就要無止境等待，好無安全感，所以轉行做保險。陳嘉賢1989年結婚後，先後誕下一子一女，但細女1歲時發現患上血癌，經過兩年化療先好返；及後陳嘉賢就開始咗做醫院義工，組織癌症病童合唱團等活動，又修讀神學課程，至今佢已擁有道學碩士學歷。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！