以下六種小精靈類型 邊種係你女朋友？

「I love POKE'MON 日夜鍛鍊去取勝～」日日捉小精靈，有無畀女友詐你型先？咁就要睇吓你女朋友係咩類型啦，呢到就有6種寵物小精靈女友，睇吓同你嗰個似唔似？

吉利蛋－溫柔型

吉利蛋性格非常溫柔，好似佢哋個袋裝住自己啲蛋，而呢啲蛋係有豐富嘅營養，��利蛋遇到受傷嘅人或者寵物小精靈就會分畀佢哋食，等佢哋快啲好返。之前就提過武藏曾經想做護士，所以入讀吉利蛋護士學校，而呢間學校其實係專門培訓吉利蛋做護士架。吉利蛋一般會喺寵物小精靈中心擔任護士喬伊嘅助手，佢哋會用唱歌技能等病人可以安靜入睡，亦因為習得好多治療能力，所以非常懂得照顧別人，好似有一集講因為發生車禍導致好多寵物小精靈受傷，雖然傷者又多又麻煩，但吉利蛋都係好溫柔咁照顧佢哋。白衣天使咪就係吉利蛋，好似你病咗，女友會不眠不仔照顧你，又或者你遇到挫折，會好好鼓勵你，呢種仲唔係溫柔型女友？

伊貝－女神型

睇個外表都知伊貝係女神，兔仔咁得意嘅耳仔、水汪汪嘅大眼睛、奶白色嘅頸部絨毛、毛茸茸嘅尾巴，真係可愛得嚟又好靚。而且依貝性格好溫和，通常只會做寵物。梗係啦，善良嘅女神點可以去戰鬥架？女神係用嚟呵護同供奉架，梗係做伊貝女神嘅奴才啦，依貝女神仲試過畀其他精靈送花表白添呀！最緊要依貝仲可以進化做8種唔同形態，隻隻都高貴又美麗，係咪好似你個女神型女友呢？雖然日日花枝招展，但又真係著得好好睇呀，有個咁靚、性格又好嘅真女神女友真係好～

波波球－暴躁易怒型

有對貓耳朵同藍色大眼睛，身材仲圓碌碌咁，睇落可愛又無害嘅波波球，其實非常容易發嬲。點解？因為波波球好鍾意唱歌，但就係唱得太好聽，舒服到令人想訓覺，搞到波波球覺得無人有心聽佢唱歌，所以次次都好嬲畫花哂佢哋塊臉，甚至仲會發脾氣一腳踢開比卡超。係咪好似層相識呢？無錯，就係當你係女友講嘢嗰陣，因為佢把聲太好聽，你唔小心走咗神，然後見到對面女友個臉色開始變得難睇，呢個時候，你GG啦。如果程度好嚴重，女友就會好似波波球咁使出連環掌摑，你就被KO啦。

小刺蛋（小霞嗰隻）－小鳥依人型

由於小刺蛋唔會離開自己個蛋殻，所以睇落好似BB著住個尿布咁，非常可愛得意。而佢會將出世時第一眼見到嘅人當做父母，所以就成日會癡住小霞，小霞又會抱住佢周圍走，非常疼錫小刺蛋。而小刺蛋好需要人哋照顧，好似有一次喊到收唔到聲，就要比卡超、小火龍等一齊呵返。小刺蛋又好識嗲人，加上性格好樂觀，所以好多寵物小精靈同精靈訓練員都好錫佢，好似比卡超成日會照顧同保護佢，就算要對戰，因為小刺蛋使出擁抱同撤嬌，搞到比卡超都唔忍心落手出擊。小刺蛋好明顯就係小鳥依人型女友，細細粒咁一望落去已經好想保護佢，最緊要係嗲嗲哋又癡人，楚楚可憐咁真係好吸引。

傻鴨（小霞嗰隻）－天真型

傻鴨成日都傻傻更更咁，好似從來都聽唔明小霞講咩，只係一味識跟住小霞，有時見小霞有危險就會出手，雖然明知自己廢，仲可能會搞到件事更衰，但係咁有心真係幾可愛嘅。所以傻鴨一定係天真型女友，成日問「點解嘅？」，好似日常生活好多常識都唔知道，如果要佢煮嘢食，可能仲會拆咗個廚房，非常天真無知。但係有樣好，就係佢最鍾意嘅就係你，一心一意向住你，見到你做嘢做到好辛苦，都會嘗試幫吓忙，即使最後搞到搞到一鑊粥咁，但係你唔會討厭佢，就好似《惡作劇之吻》直樹唔會討厭湘琴咁～

卡比獸－宅女型

卡比獸嘅生活唔係食就係瞓，而且又成日懶洋洋唔願郁，所以有個好好瞓嘅大肚腩。呢個生活仲唔係宅女最愛？日日宅喺屋企煲吓劇打吓機，又唔介意食得大魚大肉，有啲肉地得嚟又幾可愛，個肚腩簡直係男友仔嘅專屬枕頭。呢種宅女女友不知幾正，又唔使陪佢行街，又唔使要大出血買咩名牌手袋畀佢，只要同佢喺屋企一齊打機、瞓個懶覺又一日，又唔會無啦啦發脾氣，呢啲先係最爽嘅拍拖生活呀～

圖片來源：動畫《寵物小精靈》