何太疑似前夫上過《東張西望》？何伯擬領法援向細女追討

何伯何太現身《東張西望》原來已經成個月，但係話題源源不絕。日前有網民同youtuber推敲，年幾前《東張》報導過嘅個案苦主、87歲余伯可能就係新何太前夫。當日余伯表示，經介紹下認識一名年約40歲內地女子，余伯因為想搵個伴於是同該女子閃婚，但聲稱無仔女嘅余伯太太，喺婚後上內地搞單程證時突然帶個仔出現，余伯即時「買大送細」。余太當時申請公屋並取得香港居留權，及後余伯懷疑太太疑似同同事出軌，結果結婚一年未夠就離婚收場。因為余太有兒子撫養權，余伯間公屋仲被前妻擸埋！由於余伯提到嘅離婚時間，同何太話同前夫離婚嘅時間吻合，加上何太聲稱離婚後同個仔申請公屋，的確好巧合。

何太喺尋日（6日）又開直播，佢回應咗呢個傳聞，否認前夫係余伯，又話「外面瘋言瘋語」，叫大家唔駛猜度。有網民問何太個仔係咪喺香港讀書，何太話係，又透露個仔「唔鍾意返大陸」。

雖則日前嘅直播中何太話「三、五百萬唔係錢」，但尋日嘅直播入面何伯何太點會唔講「被消失的450萬」？今次何伯多返發言時間，仲爆埋細女全名。正身在內地嘅何伯揚言返港會申請法律援助，向細女追討喺聯名戶口被提走嘅450萬。「我會放長條線，俾足時間我細女。如果逼到我最後我會同佢喺法庭見，法庭一見盜竊咗我啲錢，佢就要坐監。佢冇問過我冇通知過我，就等於偷我啲錢走，佢唔認我呢個老竇，我就唔認我呢個女」。向來全力撥火嘅何太繼續鬧何伯細女，指何小姐「黑心」、「最可恥」。

何伯又透露細女除咗keep住嗰450萬之外，以前送畀亡妻嘅多件首飾都喺細女手上，估計有十幾兩金，數目多過佢送俾新何太嘅首飾。何伯強調因為冇夾萬，於是交畀細女保管，又認為亡妻身故後首飾應該歸佢。有網民認為應該「問亡妻」點處理，何太就立即扯火話「問乜嘢亡妻？你哋真係好搞笑，梗係喺世間嘅活人話事喇！問乜嘢亡妻呀？唔好咁盟塞好冇呀？清醒啲，理智客觀啲！講法律㗎嘛。」反而何伯話亡妻應該會明白，並指一旦拎得返批首飾，他日無錢就會變賣換錢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！