何超儀首度披露陳子聰病情 嚴重內出血昏迷逾月險截肢 開造口排大小便

陳子聰(Conroy)近年身體狀況麻麻，早前更喺澳洲探家人時因急病入院，一度昏迷多時，老婆何超儀(Josie)之前曾經形容陳子聰病況「好棘」。Josie早前接受Do姐鄭裕玲網上節目The Do Show訪問，首度披露陳子聰病情，仲講得好詳細，聽到都驚！

早年陳子聰一度暴瘦如柴，何超儀指當時老公有肝硬化同直腸炎，但都康復過嚟，係因為吊鹽水同戒口先咁瘦。本來陳子聰係「煙剷」，就算唔食都要點住支煙，好返之後想戒煙，但都係打回原形。Josie要求老公食齋、戒咖啡因飲品同肥膩嘢，陳子聰就叫朋友買嘢佢食，終於為健康埋下計時炸彈。

陳子聰去年10月去澳洲探父母，無人看管下暴飲暴食，Conroy媽咪仲同何超儀講「佢食咗好多嘢，食咗好多蝦餃」！何超儀憶述陳子聰返澳洲唔夠一個禮拜，未到8點就已經因為唔舒服返房瞓，當時Conroy以為係幫父母搬重嘢整親盤骨，但Josie通過視像通話已經見到老公面色唔妥。後來陳子聰有日要揸車送人去醫院，點知去到急症室車都未泊好就暈咗。

（以下內容可能引起不安，請斟酌閱讀）

醫生發現陳子聰大動脈爆裂嚴重內出血，原因係Conroy多年來煙酒過多兼三高，加上之前患病後已被叮囑唔可以拎重嘢，結果喺屋企搬床褥搞到血管爆裂。

本來身在韓國出席影展嘅何超儀立即飛到澳洲，佢話Conroy入院後要開肚，一打開腹腔「啲血已經流到一地都係」，所以醫生要將陳子聰嘅內臟清洗同止血，全身插滿喉管。Josie形容陳子聰嘅體內「爛溶溶」，更因為要做好多手術，唔可以將開肚傷口縫合，要用醫學用「保鮮紙」包住腹部。過程中陳子聰一直昏迷，每日要大量輸血，而Josie眼見老公雙腳慢慢變紫兼冰冷，恐有截肢之嫌，於是每日食好多嘢兼著多件衫，等自己雙手暖啲再為老公按腳。

後來醫生為陳子聰換上人工血管，先得以保命，但喺搶救過程夾壞尿道，同時腎臟同直腸都有問題，一度腹漲如懷胎十月，醫生亦告知Conroy要以永久人工造口排大小二便。Josie自言照顧老公有壓力，有試過喊，但係家姐叫佢要保持冷靜同衣著正常，免得被醫院拒絕探望。

陳子聰到去年12月康復得比較好之後，由何超儀安排醫療包機送返港，並到瑪麗醫院接受治療。為咗治理搶救時後遺症，Josie叫公司同事放低公事，一齊搵醫療方案，結果搵到美國一間頂級醫院暫時處理好泌尿問題。由於康復需時，何超儀表示呢幾年唔會拍戲住，最大心願係老公可以活動自如能夠自理。

最後Do姐仲同陳子聰電話交談。Conroy聽落幾好中氣，話自己而家一周做4次物理治療，亦都對於太太嘅照顧而感動。陳子聰直言今次好幸運，以後會珍惜人生。Do姐訪問期間冇咩插咀，聽完成個過程之後亦有感而發「好感動，佢（陳子聰）好好彩有你呢個太太」，並且俾何超儀一個擁抱作結。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！