佗B頭3個月最難捱！ 郭思琳崩潰爆喊 靠吳浩康呵番

索模郭思琳閃嫁歌手吳浩康，現懷胎3個月的她分享懷孕初體驗，指曾因日日食健康餐而崩潰爆喊，又因子宮漸大而尿頻、失眠，多得準老公變身「情緒治療師」助解窘，更首次公開「一家三口」溫馨照，在好老公兼好爸爸照顧下，可開心迎接腹中新成員。

英皇歌手吳浩康（Deep）和曾參選港姐的索模郭思琳被本報率先爆拍拖未夠一年就決定閃婚，更大方承認女方已懷孕3個月。昨日準吳太郭思琳接受訪問，分享首度懷孕的心路歷程，稱初得知佗B時，因零經驗而深感徬徨：「乜都唔識，乜都唔敢食，每日Deep都安排我食營養餐，一時三刻，突然改變晒啲飲食習慣好唔慣，有次我崩潰咗，當住家人面前喊咗出嚟。」雖然Deep亦是新手爸爸，但就相當體貼，郭思琳說：「佢畀我間中有Treat Day（放寬），可以食吓辣嘢、朱古力，暫時冇乜作嘔、作悶，反而胃口好咗，係咁食嘢。」不過因子宮愈來愈大壓住膀胱，所以經常要如廁，導致失眠及皮膚變差。

月中舉行婚禮簽字

懷孕令她要承受身體變化及情緒波動，感恩全靠「母親團」陪伴度過最難捱的頭3個月：「好彩佢3位家姐都有仔有女，加上我家姐同媽咪，成日都灌輸啲育嬰知識畀我。」當然最大功臣是準老公，感受到對方的愛錫，又經常提供娛樂逗她笑，更因他生活規律，令她有極大安全感：「同佢相處好融洽、好舒服，亦都有正面嘅影響，自從知道我有咗BB後，佢更加穩重，感覺佢會係一個好丈夫、好爸爸。」從未公開過合照的她，更大方分享跟Deep和愛犬的「家庭相」，又說：「我哋都期待BB識同Madonna（指愛犬）玩。」

郭思琳透露已包了私人地方及請證婚律師主持月中舉行的簽字儀式，可是受疫情下的禁聚令影響，月中的婚禮跟想像大有出入：「難免會有啲失望，始終人生大事都想親友嚟到觀禮，依家惟有寄望疫情快啲有好轉，希望等我生完BB，快啲收身，喺最佳狀態先再擺酒慶祝啦！」至於Deep就指郭思琳是陪伴行下半生的「理想的另一半」：「我要結婚啦，好開心同大家分享呢個喜訊，嚟緊要面臨好大嘅挑戰，因為我要做爸爸。」又指將展開人生新一頁，覺得無論在生活及跟另一半相處上都要學習。