你想翻閹嗎？

(綜合報道)(星島日報報道)離開香港電台，轉眼已兩年多，變咗「自由鳥」，不再受公務員條例束縛，當然海闊天空任飛翔。足足兩年完全冇踏足港台，亦冇任何聯絡。突然，前日信箱出現一封RTHK公函。咦，乜事呢？拆開，原來為人事部發出信件，主題為——Post-retirement Service Contract（PRSC）Scheme。 即係乜？用廣東俗語講，即——翻閹計畫。 內容提及，政府推出PRSC計畫，容許各政策局及部門，僱用有特別專長、技術或從事公務經驗豐富退休公務員，以合約形式，一次性、臨時性、季節性、兼職性或短暫性工作。 信內附有一張Form，除基本資料包括姓名、地址、電話、電郵外，更問埋你退休日子當時職級。最有趣跟住問：閣下會選哪一種形式繼續服務呢？一、全職Full Time；二、兼職Part Time（請列明時間性）；三、無特別傾向（No Preference）。 選項完畢，最重錘一條問題出現——Do you accept invitation to a position which is one rank lower than your substantive rank upon retirement，即係乜呢？即係，你會否願意降一級再翻閹工作呢？ 呢條問題，相信最難回答為紀律部隊退休大Sir們。因紀律部隊，須遵守紀律，上級指示你就做，所以，階級觀念比起其他部門濃厚得多。若退休後翻閹工作，竟然由上司變下屬，要受昔日「馬仔」管，都咪話唔惡啃，容乜易對方在辦公地方公開以上司身分省你？到時，啖氣點吞呀大佬？所以，小弟好懷疑退休紀律部隊阿Sir想參加呢個PRSC計畫，會點填呢？香港電台文化，好得多，基本上不強調階級觀念（有人話「冇大冇細」），上司、下屬多只以平輩同事式相處，一切講道理為主，所以，經常下屬挑戰上司，見怪不怪。我有冇填呢張Form呢？唔話你知，等你心思思生痱滋，哈哈哈！ （阿碌開咪 曾智華） 專欄