【你的樣子如何】研究發現矮男胖女1年人工少賺1.5萬

「你的樣子如何，你的日子也必如何」本來以為呢句話已經好傷我心，點知沒有最傷，只有更傷⋯⋯早前一份刊登於《英國醫學期刊》（BMJ）嘅研究，發現連你嘅身材都會決定你嘅收入，如果男仔較矮，女仔較肥，收入就會比實力差唔多但比你高同瘦嘅同事低。

呢份研究由University of Exeter以約12萬40-70歲嘅基因資料為樣本，觀察400個同身高有關嘅基因變異，同70個體重指標（BMI）相關變數，結合實際身高同體重，與英國人體生物資料庫（UK Biobank）受試者提供嘅收入資料作比較。

最後就發現咗男仔矮嘅話，收入、工作地位、教育程度都較低，而女仔只要BMI較唔理想，收入都會較低。舉個例，如果兩個學歷背景智商差唔多嘅同事，但女嘅其中一位較重6.3 kg，男嘅其中一位身高較矮3吋（7.5cm），1年之後就會少賺1,500英磅（約15,000港元）。

嗚呀，肥人得罪你啲咩？我多啲脂肪你睇唔過眼咩？又話肥先叫有福氣嘅？不過肥都算，至少都可以做下運動減下肥，但係矮點算呀。喊出嚟，身高唔多唔少都受基因影響，生得矮我都唔想架⋯⋯