保錡＠ERROR宣佈年底成為半職業球員 自勉 「年紀不是問題」

早前本地女子甲組球會民和公民女子足球隊，喺官方社交平台上宣布「文青女神」袁澧林Angela已簽約成為旗下球員，並貼上袁澧林身穿球隊波衫揮灑汗水嘅相。有報導指Angela會先隨隊跟操，暫時未成為正式註冊球員。

估唔到話咁快又有藝人嘗試進軍球壇！男團ERROR成員吳保錡尋日發文，宣布「今年年尾我會加入一隊足總丙組球隊，成為半職業球員，再一次完成一直的夢想」，並講出心路歷程，同時貼出球星C朗拿度一條提及自律嘅訪問影片。

保錡今年33歲，對踢職業賽事嘅而言年紀算係偏大，因此佢都自言「年紀不是問題，只要堅持一定會做」、「一開始會有好多挫折同失敗，但一直堅持落去，真係做到自己腦海入面嘅事」。保錡未有透露係咪已經同本港足球聯賽嘅隊伍簽約，亦未知佢會同邊隊波合作。近年保錡不時參與長跑活動，本身熱愛足球嘅佢，早前出席活動參與小型足球賽更因為瞓身作賽，撞到大腿瘀咗一大撻。

由於近期有消息指，周星馳即將開拍新片《少林女足》，令外界聯想到袁澧林係咪會參演該片。加入公民嘅消息公布後，袁澧林發文回應，強調唔會放棄演戲，佢係因為工作而接觸足球，但澄清同《少林女足》無關。唔知保錡會唔會因為踢聯賽而被星爺相中呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！