愛回家｜Ma姐被Peter出軌網民撐與鐵面陳組新CP 杜大偉瓣數多吸金力強勁

TVB處境劇《愛．回家之開心速遞》造就出多對CP，其中一對就係Peter（杜大偉飾）和Ma姐（何芷姍飾）。不過去年6月劇情講述Peter因權鬥失敗被流放至屯門貨倉，自此就無再亮相過。日前，《愛．回家之開心速遞》播出第2380集「夜太黑，太渴望被人擁抱」講述Peter出軌，Ma姐疑似將會搭上虹豆沙湯遠（楊明）？

劇情開首講述Peter託Andy （崔錦棠飾）為Ma姐送上浪漫驚喜，恩愛行為羨煞旁人。不過，Ma姐似乎隱藏不為人知嘅秘密，並意外被虹豆沙湯遠知道；而Ma姐因某些原因要求翻看新威龍廣場閉路電視片段，被鐵面陳（王致狄飾）拒絕，沙湯遠及後發現Ma姐似用「非常手段」壁咚和色誘對方令鐵面陳改變主意，打算利用工餘時間與Ma姐一起翻看監控錄像，沙湯遠懷疑Ma姐別有用心。後來，Ma姐喺酒吧與陌生男子飲酒，竟遭人下藥，幸好沙湯遠及時阻止，呢幕亦帶出Ma姐因Peter出軌行為痛心，但又無法放棄感情嘅悲傷感，而沙湯遠嘅關懷亦似乎為之後感情線鋪路。網民對於編劇寫Peter出軌一事感到驚訝，認為編劇寫到Peter一角臭晒：「Peter有第二個女人令到Ma姐咁傷心眼淚流流，Ma姐好慘慘」、「如果唔係Peter 本身都好忙，未得閒返嚟愛回家拍嘢，編劇就唔會寫得佢咁過份」、「我同意編劇寫到 Peter 太過分了，我個人認為Peter一定不會這樣對Mia的」、「Peter本身都係賤精性格但都係嘴賤類別，今集就真係寫到佢臭曬」、「應該幫Ma姐搵返段新戀情吧」、「差D（啲）唔記得有個Peter」、「好可惜Peter 同Ma姐經歷咗好多好襯，而且上一輯愛回家都係一對」、「呢集我懷疑係分手伏線，Peter出面勾女=離開愛回家的先兆」等等。不過有網民就話覺得鐵面陳比較襯Ma姐：「我比較喜歡Ma姐跟鐵面陳」、「編劇讓鐵面陳同MA姐一起吧」、「其實我之前就覺得鐵面陳同MA姐比較配」等等。

杜大偉當年一心打算做幕後，不過於1997年誤打誤撞轉讀藝員藝訓班，並對演戲產生興趣。曾拍攝劇集《離島特警》演繹「四大天王」之一、《陀槍師姐III》、《秀才遇著兵》，仲成為力捧嘅「九男女」之一，曾夥拍陳妙瑛及向海嵐拍攝經典劇《無頭東宮》，於劇內飾演皇帝。不過，杜大偉驚覺自己主持技巧不足，主動提出參與兒童組節目擔任主持，一做就做咗十幾年。之後，杜大偉覺得變咗例行公事失去耐性，就再重投戲劇嘅懷抱，曾參演《愛．回家之開心速遞》、《十八年後的殺人告白》、《福爾摩師奶》等劇集，亦涉及主持人及司儀工作。

另外，杜大偉亦係一個瓣數多多嘅生意人，早於2015年與表哥經營火鍋店，高峰期於5年內共有7間店舖，但疫情影響下只餘下一間，不過疫情後卻於泰國曼谷開店。杜大偉亦與好兄弟「Ivan」鄧永健合作開設廣告公司。最近，杜大偉更於廣東江門開設冰室，馮素波、陳榮峻、吳香倫等藝人都有出席其開幕禮；杜大偉又與社交媒體發布數張拍攝烹飪節目嘅照片，宣布正式展開內地自媒體企劃。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！