保錡@ERROR邀炎明熹合照並大讚對方 網民重提曾串爆話唔識Gigi一事

ERROR成員吳保錡（保錡）日前出席《新城勁爆頒獎禮2023》記者會，兩台藝人同框情況下，主動邀請炎明熹（Gigi）合照，接受訪問期間更公開大讚對方係新一代超班女歌手，唱歌台風勁，又點名讚鍾柔美及詹天文嘅歌曲，保錡事後於社交平台分享與炎明熹嘅合照並寫道：「追星小保錡上線，唱歌超級超級好聽的，常常YouTube 上重播重播再重播，今日勁開心可以合照。」此舉惹起網民熱議。

唔少網民表示對保錡感到失望，認為佢呢個行為係搏見報：「為上新聞可以博到幾盡，勁呀奶到話自己小粉絲你知唔知個醜字點寫？」、「對你都好X失望」、「不如退出error 啦，唔好連累其他肥仔，dee 哥，193」、「咁鐘意追星，不如快D 去隔離台，同你既偶像合作啦」、「unfollow 」、「明知兩台fans唔啱牙，仲專登post張相出黎，都唔知你博咩？每次星運好少少，你就會攪啲屎出黎博畀人鬧，你都唔細喇？做野前都唔用下腦，大埔友都唔撐你！」等等，又有網民重提保錡2021年曾串爆表示唔識炎明熹，反問記者：「邊個嚟㗎？」及表示只認識Gigi姐（黃淑儀）嘅報道，唔少網民亦加把嘴埋去留言：「唔好以為戴咗口罩唔認得喎」、「真係俾昨日的自己鑑生打死」等等，保錡亦有回覆，直認自己當年有眼不識泰山：「OK對唔住，我兩年後學習咗，長大咗！真心欣賞佢唱歌，真係好好聽」、「人要向前看，就好像跑步，要一直進步，一直比昨天的自己快」、「我記得。之前真係有眼不識泰山，有一日YouTube 推薦左比（咗畀）我，就有聽佢唱歌！ 所以我之前真係冇留意sorry sorry！」

不過都有網民留言表示兩台歌手有互動係好事：「其實我唔會理你真心定係扮出嚟，明面上和諧就已經係一件好事，樂壇的確需要咁樣先可以發展，btw以後會留意你嘅歌」、「音樂無疆界，其實唔同台嘅歌手都可以一齊合作，百花齊放咪仲好。唔好再咁老土諗唔同公司就好似敵人」、「睇完啲comment，真係令我"大開眼界"，唔講真係以為gigi做咗啲咩十惡不赦嘅事一個人嘅出身冇得選擇，亦唔係錯事」、「好歷史性的畫面，勁」、「因為那句說話，很多人都對你反感，現在如長大了，真的學識尊重和欣賞別人，那起碼我個人已對你已不反感，更欣賞你有品味」等等。另外，過往於另一位聲夢小花鍾柔美（Yumi）IG帖文幾乎都見到保錡讚好嘅蹤跡，有網民就留言問：「你唔鍾意Yumi啦？」保錡則再回應：「有留意呀」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！