做多一年夠錢退休 大仔回流讀醫 網民讚森美仔女升學部署「識玩」

今年年尾就「入五」嘅森美，日前出席有關子女升學理財嘅銀行活動時，提到曾經流學英國讀高中嘅大仔梁曦樂（Lancelot）因為有感英國讀醫開支大，但係英國執業醫生收入唔高，於是決定回流。而森美17歲嘅細女出年考國際文憑試(IB），如果阿女選擇留港升學，可以慳返唔少，甚至令佢搵多一年錢就可以退休。

有關報導引起網民開post討論，有人認為Lancelot考慮到英國醫生收入水平而回流係正確選擇，甚至讚「識玩」，因為可以避過文憑試DSE，以非聯招途徑入讀港大醫學院。有巴打自稱有中學同學都係類似情況，中四之後去英國讀書，同樣成功入讀香港嘅大學醫科課程，而家畢咗業人工高，當年升學嘅開支隨時做幾年醫生就搵得返。

不過Lancelot喺英國考A-Level獲得4A*嘅佳績，讀到醫似乎係「識玩」之外，仲要真係讀得先得！

識玩識讀之外，森美父子都識計數。早年森美受訪時講過，佢曾經反對Lancelot去英國讀書，更試過同個仔講數，話出國開支要300萬，如果阿仔肯留低，森美願意即時俾300萬現金「利誘」個仔。但係Lancelot更加心水清，話將來可以賺到多過300萬，森美就知道個仔好想出國，於是「放人」。而出國讀書之後，森美覺得Lancelot比以前更主動學習，仲話以前阿仔喺學校「出名曳」，而家就識得收心養性。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！