做騷咩？情侶放閃最令人不爽的5個行為

Taylor Swift同「洛基」Tom Hiddleston三日唔埋兩日就放閃是常識吧，最搞笑係早前搵埋老友Blake Lively同佢老公「死侍」Ryan Reynolds一齊影閃照，Ryan個樣就一臉無奈，被網友笑佢心諗「救我啊！到底我做錯咩要一齊影？」。

情侶愛得甜蜜係正常，但係日日公諸於世，你有無諗過身邊朋友嘅感受架？以下就係五個令人不爽嘅放閃行為：

1. Facebook、Instagram、Snapchat放閃無極限

每日一打開手機，同一張情侶相好似冤鬼咁出現Facebook、Instagram同Snapchat。如果係普通合照我都算，但係曬命式嘅禮物相、親密到爆嘅錫錫、抱抱、甚至床照都要post一番，最恐怖係caption整番啲世紀表白或者勵志說話，好似「我搵到我人生中最大嘅幸福啦，你哋都可以架。」其實如果你兩個唔好瘋狂洗我版，我本身真係幾幸福。

2. Facebook塗鴉牆當私人聊天室

明明你可以用Whatsapp啦或者係Facebook Messenger啦同男/女朋友傾計，但係偏偏要用公開貼文同對方講肉麻嘢，一次半次都算，日日都係咁真係想block咗你。更甚者仲會係其他人嘅貼文下面你一來我一往咁耍花槍騎劫人哋，到底有無顧及下朋友嘅感受。

3. 你一口我一口互相餵大家食嘢

其實情侶們係有手架可？點解好似殘廢咁要人餵？私底下係屋企做我唔理你，但係出嚟聚會，要成班朋友望住你兩個擘大個口，一邊發出古怪嘅「呀」聲，一邊餵嚟餵去，猶如進入無人之境，到底是要怎樣！

4. 疊字裝可愛

就算有朋友在場，都忽然失去語言能力，講嘢突然好似細路仔咁，咩都變成疊字，好似「BB，你食唔食麵麵呀？」、「唔要啦，人哋要減肥肥啊」，知唔知係你哋隔離聽到，真係肉麻到好想嘔呀。

5. 難捨難離

同朋友出街，不停講幾掛住另一半，明明10分鐘前佢先送你嚟聚會，使唔使講到世界末日咁呀？出得嚟見朋友，無論見到咩食咗咩，都要即時Whatsapp或者Snapchat畀男/女朋友，到底你係同我出街定同佢拍緊拖呀？

唔該情侶們，為顧及他人弱小心靈，請酌量放閃，同埋拜託你眼中留番少少位置畀朋友好嗎？

圖片來源：Britany Maack Instagram