全民造星4|梁祖堯解釋著高踭鞋原因 網民大讚找數真漢子

·3 分鐘文章
梁祖堯
梁祖堯

ViuTV選秀真人騷《全民造星IV》喺今個星期開展第三回合淘汰賽,大家除咗留意參賽者嘅表現之外,仲留意到喺後台睇表演嘅B組導師梁祖堯,佢竟然剃掉腳毛及著上紅色高踭鞋,結果吸引唔少網民注意兼討論。

去到今日(1日)凌晨,梁祖堯喺社交網站解釋著高踭鞋嘅原因,原來佢係為咗「找數」。佢上載與B組參賽者嘅合照並留言話:「啱啱做完舞台劇返到屋企,我阿媽問我,點解你會着住對高踭鞋上造星? 答案得兩個字:找數。 呢一round 開始分組嘅時候,我覺得大家都要做多啲基本功嘅訓練。馬欣係一個高跟鞋舞老師,我就叫咗佢調教所有女仔着高踭鞋,點樣行點樣跳舞,身體點樣郁。馬欣仲幫大家買咗高踭鞋,每人一對,用作練習,因為原來好多女仔都冇高踭鞋。 高踭係來到,多咗一對,龍船咁大,係43號,原來班女仔訂多咗一對送俾我,話我都要同佢地一齊學,梗係好啦!作為演員無論如何多個技能都係好!嗰日大家試鞋嘅時候,班女仔話:比賽嗰日你要着啊!我話,好啊。 跟住一路排練排練排練排練排練排練排練排練排練排練,去到比賽當日,基本上佢哋都已經唔記得咗,但係我記得,所以呢條數我一定會找。 所以當晚就著住高踭鞋了。 作為男人,我覺得有兩種痛,未試過係一定唔會明白。一樣係生仔(M痛我都歸納埋呢樣),一樣係着高踭鞋。 比賽當日,我同佢哋講,你哋著幾耐我就著幾耐。隻腳痛到仆街,腳踭痛腳趾起晒水泡,腳板底抽筋,小腿抽筋,痛左足足三日。以前演出都有著過,但係只係着10幾分鐘,原來着住一晚係咁痛。係咁x痛。我都只係坐喺度,佢哋仲要着住嚟表演。真心respect 的。 着高踭鞋的痛,我體驗了一晚。女孩們,我愛你們。 生仔的痛,我冇辦法體驗,媽媽,我愛你。」

唔少網民得知原因都紛紛留言表示欽佩及大讚佢係找數真漢子,例如「一個充滿愛的家庭 respect!!」、「好感動呀 你係一位好導師係一位好演員」、「男人嘅榜樣,respect」、「Respect 同𠹺真心: 你好carry到」、「Love you 多謝你真心去愛 去身同感受 佢地有你做導師係福氣」、「辛苦晒找數媽媽」、「找數真漢子」、「唔怪得,尋晚睇住都諗點解,原來係阿祖好有心的「找數」安排,感謝好有heart又專業的導師,真心感謝你!每一晚都睇、支持每位女生,為自己而戰、大努力,respect!」及「見你剃晒腳毛咁著好尊重件事,都比返個respect你」等等。

《全民造星IV》截圖
《全民造星IV》截圖
梁祖堯任《全民造星IV》B組導師
梁祖堯任《全民造星IV》B組導師
梁祖堯任《全民造星IV》B組導師
梁祖堯任《全民造星IV》B組導師

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能