全民造星5｜Ash撼低Kakit殺入10強 王鋒成負評王被網民叫讓位

ViuTV選秀節目《全民造星V》進行得如火如荼，20位參賽者以抽籤形式，進行一對一生死對決，爭奪10強位置，而現時希晉（王希晉）、王鋒、Taco（黃泓祖）、Lyman（香胤宅）及亨仔（陳鎮亨）、Snoopy（詹仕偉）、Tsoul（田曜誠）及Ash（盧信宥）已經順利躋身決賽，其餘十強選手將會陸續揭曉。

噚晚（29日）嘅最新一集，先有好兄弟Kakit與Ash嘅對決，Kakit以集跳舞、Rap及演戲與一身嘅AI題材《Who am I》作為表演項目，除咗得到評判大讚之外，唔少網民都認為Kakit表現出色、有才華及潛質，絕對係可造之材；不過可惜佢只獲得一盞燈，敗給表演《小心地滑》嘅Ash，佢表示爸爸喺比賽中離世，身在香港嘅佢未能見佢最後一面，所以佢想將心聲寫成歌詞去思念爸爸，當中評判馮穎琪仲睇到眼濕濕。

節目出街後，唔少網民都認為賽制殘忍，因為Kakit同Ash嘅表演嘅好好，留言大讚佢哋，例如「kakit 真係好正，好多變化，即使唔喺10強，都唔會忘記佢嘅光芒，特別係Unholy 佢係一塊寶玉，希望佢喺呢行會闖出自己一片天」、「勁到有時唔記得佢得19歲」、「kakit真的很值得入10強」、「Kakit真係一個可造之材 , 希望日後會見到佢」、「還我kaKit」及「Kakit 哥個表演入唔到十強，可惜。」、「Ash算係翻唱小心地滑中最好嘅一個，其實有時聽MC自己live唱都有d吃力」、「Ash 已經係唱得唔錯 真係跳唱都有」、「Ash值得入十強」、「佢都真係算全面 又唱得 又跳得」及「Ash絕對係十強之選，呢首歌唔易唱，各方面都好」等等。

有唔少參賽者被網民認為係十強人馬，不過已經殺入十強嘅王鋒就被網民留言負評兼認為佢唔應該入十強。擅長跳Locking嘅王鋒喺節目未出街之前，已經係主題曲企喺中心C位嘅其中一位參賽者，更被指係大熱人選之一。喺競逐60強位置時，佢一身迷彩war game裝出場，並瞓身表演Locking，結果獲得評判一致好評獲得三盞藍燈，當時網民亦大讚佢跳舞好睇。不過喺爭入40強嘅Dance Battle中，王鋒代表fung莎星辰A組對戰蕾安多芬B組，佢被阿澤踢爆擅改舞步 ，隨即引來網民強烈的反感，紛紛留言負評；其後ViuTV疑似補拍王鋒嘅道歉片段，節目編導更喺IG疑似單打阿澤撐王鋒，令網民對佢非常不滿。

去到爭入十強嘅一對一生死對決，王鋒抽到對決被網民認為係較弱嘅阿生，王鋒就算唱歌唱到走晒音，竟然可以輕鬆以5比0壓倒性勝出。一班網民聯想到係ViuTV為咗可以令王鋒躋身決賽，所以刻意做出對阿生嘅抽籤結果，紛紛留言表示不滿及指佢係今屆負評王。

隨住十強名單陸續揭曉，越嚟越多網民留言指佢冇資格入十強，除咗叫佢「讓位」仲力數多宗罪狠批佢，例如「可唔可以用佢換返做工佬」、「其實唱得唔好， 走音， 又唔夠氣咁， 聽得好辛苦」、「樂樂好過他好多」、「真心Ritchie好過佢」、「其實觀眾緣好重要！無論跳舞點叻，觀眾唔鍾意你就係唔鍾意！」、「做工佬有觀眾緣好多」、「又唔係唱得好，我唔覺得佢係偶像囉」、「難聽到。。。」、「大佬，佢唱到走晒音，仲讚」 、「跳舞幾好都無用，明顯無觀眾緣，咁多負評」、「再睇都係覺得老土」、「完全唔明點被佢charm到，我一啲feel都無」、「個look完全唔掂，唱歌又難聽，又要扮型，救命啊」 、「自己人造馬做到出晒面」及「只係剪佢啲鏡頭，又淨係剪評判讚佢嗰啲出嚟」 等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！