八號波妮妲打到嚟？唔怕！「李氏力場」4招救香港

天文台就話聽日呀熱帶氣旋「妮妲」可能會打到嚟，成為今年第一個八號波。呢個說法，小編有啲保留，因為香港一直有「偉大」嘅「李氏力場」保護，極少熱帶氣旋能夠衝破力場。唔信？連香港政府都親口承認佢嘅存在呀！等我哋一齊重溫「李氏力場」如何用4招救香港：

1. 施丹轉身（V、U形反彈）

「李氏力場」嘅威力非常強大，即使熱帶氣旋原本路徑會正面吹襲或近距離掠過香港，只要當佢哋接近香港一定距離，「李氏力場」就會發揮阻力，逼使熱帶氣旋偏離香港。有時「李氏力場」力量過猛，甚至會爆發出唔尋常嘅反彈力，令熱帶氣旋以V或U形彈離香港。

經典例子：

2006年太平洋颱風季最強的熱帶氣旋颱風西馬侖－距香港東南偏南約430公里時，忽然嚟個華麗轉身，完全改變路徑，V形反彈遠離香港。西馬侖似乎係刻意一接近香港，就施展施丹轉身，唔尋常地「彈走」，故被視為「李氏力場」代表作。

2013年颱風羅莎－起初係威係勢咁，不斷增強到強颱風程度，仲向香港方向步步進逼。點知越近香港就行得越慢，甚至去到滯不前，仲無啦啦減弱。最接近香港距離係以南約220公里，之後好似觸電咁忽然V形反彈遠離香港，佢改變路徑得奇怪嘅行為，被譽為「西馬侖翻版」。

2. 晚來朝去保證返到工

當天文台掛八號嘅時候，香港大多數工業都要停工，搞到「停工停市」，咁會嚴重影響經濟。為免香港市民手停口停，「李氏力場」盡量會拖延熱帶氣旋，令佢喺放工時間先登陸，又會喺朝早返工前就趕佢走，保證大家可以如常返工，確保香港經濟繁榮穩定。

部分例子：

3. 收市掛八號

香港作為國際金融中心，股市能夠正常運作係非常重要，但如果打八號風球，香港就要停市。所以如果「李氏力場」真係無法改變到熱帶氣旋嘅路線，但仍然都會盡力阻擋熱帶氣旋直至收市之後先畀佢登陸掛八號。

經典例子：

2009年颱風蓮花－蓮花曾兩次以90度急轉彎逐步接近香港，但最後仍不敵「李氏力場」，到達香港時力量已幾乎耗盡，只趕得切喺下午4:40迫使天文台掛八號波，但香港已經收市，登陸期間市面幾乎無風無雨，更被恥笑為「蓮花一現」。

4. 回馬槍救股市

不過「李氏力場」都唔係次次都會趕走熱帶氣旋，因為有時都要利用熱帶氣旋「停市」嘅特點。為咗阻止香港股市大幅下跌，保護香港經濟，「李氏力場」有時都會整個回馬槍，拉返個熱帶氣旋嚟香港，令港股即刻停市止蝕。

經典例子：

2007年熱帶低氣壓帕布－原本帕布好鬼弱，風力得個三號信號，之後仲慢慢離開香港。點知第2日朝早突然整個「回馬槍」，180度轉返嚟香港，仲突然發威喺晏就2點半變成八號波。原來因為嗰日股市急跌，所以「李氏力場」就停止驅趕帕布，就可以提早收市止跌（跌咗646.45點）。帕布亦都成為自1946年有記錄以嚟，第1個嚟嗰陣無掛八號，無啦啦「打回頭」要掛八號嘅熱帶氣旋。

同場加映之官方承認：

圖片來源：香港天文台網頁、政府新聞網Facebook