【北京車展】400百匹TT挑戰Cayman S
兩年一度嘅北京車展又開鑼,開幕之前我keep住日日上啲內地車網reload又reload,睇下有冇流出今年嘅新車清單,結果係有……等如冇嘅,因為今年「北車」唔似往年咁巴閉,全球首發嘅車款唔多亦唔算吸引,而大部分大陸車都唔關我哋事,更加難搵焦點。
![](https://s.yimg.com/ny/api/res/1.2/JBZAnR9_0y0j5mXZvXNbYQ--/YXBwaWQ9aGlnaGxhbmRlcjt3PTk2MDtoPTYzMQ--/http://40.media.tumblr.com/af9a816ed89d99b441b32102efdcaedf/tumblr_inline_o6a1a5g7UZ1t4qai9_1280.jpg)
認得最右邊係邊個冇?德國體操王子阮馬素,係呀,佢係718 Cayman車主。
![](https://s.yimg.com/ny/api/res/1.2/TivoFSR9ssHPaHiW1PWpTQ--/YXBwaWQ9aGlnaGxhbmRlcjt3PTk2MDtoPTUzNg--/http://41.media.tumblr.com/0894fff67c76ecc0b5a1cca7e2e31603/tumblr_inline_o6a1aiov1z1t4qai9_1280.jpg)
718 Cayman生日,作為同宗兄弟718 Boxster梗係要泊埋影張相。
一如往年,「北車」都有個所謂主題,今年就著重未來汽車,唔少大陸車廠都發表佢哋嘅新科技。咩話?仲係電動車?Out咗喇,而家興講無人駕駛吖嘛。不過呢,曾經有大陸生產嘅電動車無原無故爆炸,咁無人駕駛科技有幾利害,自己諗下啦……其實都係跟番個環球車壇大趨勢啫,歐美嗰邊個個話搞無人駕駛,大陸又咁多「高科技」公司,點可以唔搞埋一份,其中樂視(LeEco)就搞咗架LeSEE,除咗識自動導航、自動駕駛之外,仲有遙控或自動泊車,不過只係概念車階段,十畫未有一撇。
![](https://s.yimg.com/ny/api/res/1.2/IvjQ3LZ09SxCop4hzuuQsQ--/YXBwaWQ9aGlnaGxhbmRlcjt3PTk2MDtoPTcyMA--/http://41.media.tumblr.com/a60d9c33c302d667d903283b4b15b838/tumblr_inline_o6a1avkKmv1t4qai9_1280.jpg)
TT RS個樣就冇乜驚喜,係隻灰色叫幾潮,不過一啲都唔襯TT個外型。
![](https://s.yimg.com/ny/api/res/1.2/xk1E92J3hd8OwwDqk8StXA--/YXBwaWQ9aGlnaGxhbmRlcjt3PTk2MDtoPTcyMA--/http://40.media.tumblr.com/e3e4c21a3d3223adbf0cefe616dbc237/tumblr_inline_o6a1bg11o01t4qai9_1280.jpg)
仍然係2.5直5 Turbo,不過換咗鋁合金缸體,輕10kg。
![](https://s.yimg.com/ny/api/res/1.2/TdbLjGHzBiz9XX_rjucQMQ--/YXBwaWQ9aGlnaGxhbmRlcjt3PTk2MDtoPTYzOA--/http://40.media.tumblr.com/a9e20b9b302282a9c39f6cedaa4450d2/tumblr_inline_o6a1crShoE1t4qai9_1280.jpg)
另一款首發車CX-4,可能代表住萬事得CX家族雙數車系嘅開始。
![](https://s.yimg.com/ny/api/res/1.2/OLbmlQLZ6fAV53MfAtLyew--/YXBwaWQ9aGlnaGxhbmRlcjt3PTk2MDtoPTYzOA--/http://41.media.tumblr.com/353fb6fc17c1d96f6293b78644f11b32/tumblr_inline_o6a1d4VRUM1t4qai9_1280.jpg)
CX-4個型幾討好,流線型幾有跑味,但性能就一般。
![](https://s.yimg.com/ny/api/res/1.2/S_RUcXBakUmnUkBOWYTY6A--/YXBwaWQ9aGlnaGxhbmRlcjt3PTk2MDtoPTY0MA--/http://36.media.tumblr.com/5e573161b2507609e994a578b1ed1565/tumblr_inline_o6a1dwK40G1t4qai9_1280.jpg)
Infiniti都出咗架首發新車叫QX Sport Inspiration,開始進攻中小型SUV市場。
除咗啲離地嘢之外,今年北車最多人留意嘅,應該係Boxster個孖生兄弟Cayman。話說早輪Boxster兄換咗副水平四汽缸Turbo機器,廠仲幫佢重新包裝改埋名,用番以前同樣係四汽缸中置引擎嘅718賽車做型號,全名叫做718 Boxster。咁有開篷自然有硬頂啦,今次北車呢架硬頂版718 Boxster——即係718 Cayman就做全球首發。如果大家有留意開大陸車市嘅話,都知道波子食糊一向唔係靠跑車,911、Boxster同Cayman之類嘅銷情,遠遠唔及Panamera、Cayenne同Macan之類非傳統波子,今次北車廠方揀718 Cayman做主角都幾反傳統,可能係趁住內地個SUV市場放緩,借勢出力谷起啲跑車,反正廠一直都話想咁做。
![](https://s.yimg.com/ny/api/res/1.2/WnycikgnCAxJXkyQRWfwmw--/YXBwaWQ9aGlnaGxhbmRlcjt3PTk2MDtoPTcyMA--/http://40.media.tumblr.com/870183f8690e75e3def575d6808c5c30/tumblr_inline_o6a1esWcen1t4qai9_1280.jpg)
奧迪Connected Mobility Concept,基本上係一架可以上網連線嘅Q3。
![](https://s.yimg.com/ny/api/res/1.2/.bnHPWiFStWEWZKE6_6R5Q--/YXBwaWQ9aGlnaGxhbmRlcjt3PTk2MDtoPTcyMA--/http://40.media.tumblr.com/d5b3406943156c7fe5bc9d22c774dbd2/tumblr_inline_o6a1f5WymC1t4qai9_1280.jpg)
最特別係車尾有塊電動滑板,真係路都唔駛你行。
![](https://s.yimg.com/ny/api/res/1.2/px_kDyqjXWYDytUB7QgA3g--/YXBwaWQ9aGlnaGxhbmRlcjt3PTk2MDtoPTYzOA--/http://36.media.tumblr.com/299ba27b0425dab5a0ac4818c49d7c03/tumblr_inline_o6a1fnCAtB1t4qai9_1280.jpg)
樂視嘅LeSEE,唔係「利是」,係一架無人駕駛嘅電動概念車。
![](https://s.yimg.com/ny/api/res/1.2/xzXwahuZxHQq.jlcu1kFkQ--/YXBwaWQ9aGlnaGxhbmRlcjt3PTk2MDtoPTYzOA--/http://41.media.tumblr.com/ecbc798ae414281a87553d9b08267cf6/tumblr_inline_o6a1g02oN71t4qai9_1280.jpg)
北汽出品Arcfox-7a電動超跑,0-100km/h只需3秒左右,擺明打BMW i8。
講開跑車,同屬福士集團嘅奧迪都有新作,就係新一代TT嘅高性能版TT RS。繼續沿用2.5公升5汽缸Turbo引擎,不過就係全新設計,換咗鋁製缸體,足足減重10kg。咁啱同場world debut嘅718 Cayman S都係2.5公升Turbo(水平對向4汽缸),所以坊間都視今次北車係奧迪向波子挑機嘅機會。作為傳統跑車世家,睇落波子冇乜著數,因為TT RS有成400匹,比718 Cayman S多50匹,如果計得盡啲,兩架車牌費一樣俾咁多,TT RS仲要多兩個dog seat,加上Cayman S轉用4汽缸引擎又俾人「降呢」嘅感覺,TT RS真係有可能搶走佢啲客。
![](https://s.yimg.com/ny/api/res/1.2/lvDhQqUel4gxRDcob7M67w--/YXBwaWQ9aGlnaGxhbmRlcjt3PTk2MDtoPTYzOA--/http://40.media.tumblr.com/87939e93ab4412646e08350981ef677c/tumblr_inline_o6a1gj3QKX1t4qai9_1280.jpg)
「前途K50」舊年上海車展都見過,齋睇外型設計就真係幾有「前途」。
![](https://s.yimg.com/ny/api/res/1.2/81XcvA8I5lelMCVn2T1wpg--/YXBwaWQ9aGlnaGxhbmRlcjt3PTk2MDtoPTYzOA--/http://41.media.tumblr.com/4ca58b7e17ee935c595825d488fec937/tumblr_inline_o6a1gyp5nl1t4qai9_1280.jpg)
認唔認出係咩車?係國產紅旗嚟喎,叫B-7257概念轎車。
![](https://s.yimg.com/ny/api/res/1.2/f3bn0newykRkNOohtmVEVQ--/YXBwaWQ9aGlnaGxhbmRlcjt3PTk2MDtoPTYzOA--/http://41.media.tumblr.com/5fbe0de9bd716820978f7e5ee7f6d6eb/tumblr_inline_o6a1hdIUiq1t4qai9_1280.jpg)
對開式車門一啲都唔新鮮,但車廂入面收埋咗套中國茶具先犀利。
![](https://s.yimg.com/ny/api/res/1.2/Ue0HzJ_mILbUIjzedSQM6w--/YXBwaWQ9aGlnaGxhbmRlcjt3PTk2MDtoPTYzOA--/http://41.media.tumblr.com/074db570e57b3a50f9e9f38199f0b2ac/tumblr_inline_o6a1hvNfKb1t4qai9_1280.jpg)
IAT四驅車,全車黑孖孖十足軍用蝙蝠車,賣成185萬美金!
無論係波子定奧迪,呢幾年都不斷擴展車系,唔同系列改少少又話出個新型號,呢招寶馬都明顯學緊,出齊1,2,3 , 4 , 5 , 6, 7咁多系;地球另一邊嘅萬事得都意識到產品多樣性嘅重要,於是今年喺北車推出全新車CX-4,亦係全球首發車之一。本來M記就已經有CX-3、CX-5、CX-7同CX-9,今次終於搞埋個雙數車系出嚟,情形就好似寶馬由1系拆出2系、3系拆出4系咁,不過,CX-4同其他CX非常唔同,外型比較扁同流線型,十足歐洲流行嘅Cross-over SUV,而且車尾夠晒斜,個款幾有跑感。外型唔錯,但引擎同波箱就冇乜驚喜,都係2.0或2.5 SKYACTIV配六速自動波,仍然冇Turbo,講性能肯定唔夠歐洲車走,叫做個樣幾討好,做腳車都唔失禮囉。