十大中文金曲2024｜JW王灝兒台上「出貓」 偷睇掌心筆記惹熱議

《十大中文金曲頒獎典禮2024》噚晚（23日）舉行，雖然有唔少歌手缺席，不過各個獎項依然順利出爐。頒獎禮一共頒發多個獎項，包括「十大中文金曲獎」及「優秀流行歌手大獎」 等等，當中榮獲「優秀流行歌手大獎」嘅JW王灝兒領獎後現場演繹半首作品《13歲的天堂》，竟被發現多次「出貓」 偷睇掌心歌詞筆記，惹嚟唔少批評，而佢今日（24日）亦發文回應解畫。

噚晚頒獎禮舉行期間，得獎嘅歌手都被安排演繹自己作品，一眾歌手都準備充足獻唱，不過輪到出道14年嘅JW演出時，就被發現頻頻望向寫滿歌詞嘅手掌「出貓」，而片段亦被專頁「難聽歌手俱樂部」發布，隨即引嚟網民批評：「呢個真係世界級」、「自己歌都可以唔記下歌詞，仲話優秀流行歌手，優啲乜」、「無諗過佢咁唔專業寫歌詞落手」、「臨時演員都係演員！認真d啦！」及 「This is a mistake she will regret for the rest of her career.」等等。

今日，JW都有發文解畫：「經過15場嘅Broadway show⋯同埋連接住嘅演唱會⋯ 啱啱趕得切去頒獎禮🙈🥹 sorrrrrrrryyy 背完舞台劇再要背30首歌再背四首歌嘅舞步，my goldfish brain really 背唔晒所有嘢 😭😭😭 下次一定背晒佢！！！！！😭😭😭」唔少Fans都有留言安慰：「唔緊要啦！這就是可愛及真性情的你😍😍但又好攪笑, 第一次見有歌手咁樣記歌詞😂😂」、「加油JW💪唔好理佢啲噪音」及「你已經好好肯唱live好過啲唔唱live嘅歌手🤗」等等。

十大中文金曲｜多位得獎歌手缺席 內地SING女團表演被指似賀年節目 DJ Soda 撐起全場氣氛（附完整得獎名單）