去邊啊Do姐｜鄭裕玲被指與5大男神互動尷尬 網民：浪費哂主持嘉賓

由鄭裕玲（Do姐）主持嘅HOY TV全新旅遊節目《去邊啊Do姐》9月4日起逢星期一至五晚上8時半播出，亦係Do姐離巢TVB後嘅頭炮作品。Do姐喺節目中聯同5大男神：林家謙、應智越、洪嘉豪、Tyson Yoshi、魏浚笙（Jeffrey）一齊去旅行，早於節目未播出前，Do姐喺IG分享預告片段，又用「1. 靚仔多嘴 2. 聰明奄尖 3. 大隻游（遊）魂 4. 有禮天真 5. 搞笑百厭」形容5位男神，叫觀眾們自己估下陪玩陣容有邊幾位，又指成個旅程可以想像要幾開心有幾開心，要幾嘔血有幾嘔血。及後，當釋出拍攝陣容後，一班網友都相當期待；但《去邊啊Do姐》至今播出一星期，反應竟不如當初熱烈，網民更狠批浪費晒成個節目。

其中，網民就批評《去邊啊Do姐》嘅製作，先指節目內容未如一般旅遊節目深入，景點唔特別之餘更是走馬看花，另外又指其剪接同拍攝手法較差：「D景點又唔特別，介紹又唔深入，交流又冇火花」、「後製出事，節奏唔掂，浪費了do姐同幾位靚仔」、「一個字 —— 悶 有Do 姐、林家謙、Jeffery 都可以拍得咁悶，真係嘥晒！」、「老實講成個製作都有問題，剪接同拍攝手法好差，氣氛尷尬，極沉悶，內容無重點太散亂，根本似飲食節目多過旅遊節目，講兩句又食，每個所謂嘅景點都係講幾句帶過又跳下一到，基本想無一個令人深刻/記得嘅位，曬哂啲嘉賓同do姐，相信只係嘉賓同do姐令到個節目有人睇，如果換轉係第二啲人收視一定勁低」、「旅遊節目啲地方講兩句就完，去左邊都唔知，制作得咁差，浪費哂主持嘉賓」等等。

雖然嘉賓們夠晒靚仔吸睛，但唔少網民都話睇到佢哋同Do姐嘅互動其實好尷尬：「完全吾好睇，一係淨係睇番Do姐一個算」、「節目真係好悶, 佢哋互動真係好生硬同尷尬」、「睇左3集，個節奏好沉悶, 介紹D野全無特色，D新人個個都驚講錯野比Do姐窒，表現得非常唔自然，尷尷尬尬咁，Do姐自己一個人host可能更好睇！」

唔少網民都表示懷念Do姐同農夫陸永同C君嘅合作，直言喺過往佢哋嘅合作之中睇到有好多火花出現，農夫嘅駁嘴駁舌又衍生好多爆笑位：「都係夾農夫好睇好多」、「Do姐&農夫 永遠最好笑」、「夾農夫好睇d」、「又一個冇腦，真係好悶。農夫堅有料到，冇冷場」、「認真，好悶，同part C君陸永，差好遠，睇咗半集已經唔想睇」、「農夫好笑好多」，「悶到喊… 呢三十分鐘係涯住睇。求農夫返嚟」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！